Prej 1 marsit të vitit 2017, pagat e mjekëve dhe infermierëve do të rriten me 10 për qind. Jo vetëm kaq, për kategori të caktuara shtesa mujore do të jetë edhe më e lartë. Tre muaj para skadimit të mandatit, Qeveria vendos të tregohet dorëlëshuar duke shpërblyer me rritje trupën e bluzave të bardha. Veç tyre, shtesës do të mund t’i gëzohen edhe sanitarët, për të cilët rritja do të jetë deri në 35 për qind.
RRITJA
Referuar Ministrisë së Shëndetësisë, një mjek i cili aktualisht përfiton 54 mijë lekë, me shtesën që do të nisë të aplikohet pas 1 marsit, do të marrë 59.400 lekë. Por përtej rritjes së pagave, që është një politikë e përgjithshme në të gjithë sektorët ku shëndetësia ka një rritje me 10 për qind, që nga një 1 marsi do të dyfishohet edhe shpërblimi për shërbimin e mjekut roje.
Kjo do të thotë që nga 17 mijë lekë që paguhet ekstra aktualisht, një mjek roje do të mund të përfitojë 34 mijë lekë. Pra, në këto kushte paga shkon mesatarisht 94.400 lekë në muaj për ata që punojnë turni i tretë. Një tjetër kategori për të cilën është menduar më tepër, në raport me të tjerët, janë edhe punonjësit e shërbimit të urgjencës dhe ata të reanimacionit.
“Kush punon në shërbimet e urgjencës në çdo spital, në QSUT, Spitalin Universitar të Traumës, në dy maternitetet e Tiranës, po edhe për këdo që shërben për çdo lloj shërbimi reanimacioni, do të marrë edhe një shtesë tjetër 25% mbi pagën”, ka pohuar ministri Beqaj. Gjithsej bëhet fjalë për 4650 mjekë dhe 13.765 infermierë që përfitojnë.
Për mbulimin e këtyre shpenzimeve, në buxhetin e shtetit Qeveria ka parashikuar një fond rreth 1.3 miliardë lekë ose rreth 9.3 milionë euro vetëm për rritjen e pagave.
BONUSI
Bonusi i ofruar nga Qeveria për mjekët që do të pranonin të punonin larg qendrës së tyre të banimit, nuk ka dhënë rezultatet e pritura. Shtesa 1 milion lekë të vjetër në muaj veç pagës, nuk i bindi bluzat e bardha për të lidhur kontratë në spitalet rajonale. E zënë ngushtë dhe në kushtet kur kriza për mjekë specialistë në rrethe sa vjen e bëhet më shqetësuese, është parë e udhës rritja e bonusit.
Rreth 2 milionë lekë të vjetër pagë do të kenë në dispozicion ata mjekë që do të vetofrohen për të punuar larg zonës së banimit. “Kush pranon të punojë në këto spitale dhe të lërë Tiranën, do të ketë një të ardhur mujore rreth 2 milionë lekë të vjetra”, bëhet e ditur nga Ministria e Shëndetësisë.
Nga të dhënat zyrtare mësohet se janë rreth 200 vende vakante në spitalet rajonale dhe bashkiake të vendit. Kur ka kaluar më shumë se një vit nga lançimi i nismës, duket se shifrat janë ende shumë larg pritshmërive. Vetëm 7 kontrata të firmosura për të përfituar nga bonusi. Kriza për mjekë specialistë është prezente më së shumti në zonat e thella të vendit, si Pukë, Has, Kukës, Malësi e Madhe, Tropojë, Dibër dhe Bulqizë.
