Rritja e shpejtë e numrit të makinave elektrike gjatë vitit 2024 ka sjellë një nevojë të madhe për zhvillimin e infrastrukturës përkatëse, duke përfshirë instalimin e pikave të karikimit.
Një shembull i fundit është Inspektoriati Qendror, i cili ka publikuar një tender për instalimin e karikuesve të shpejtë për automjetet elektrike.
Gjatë muajit nëntor, janë regjistruar gjithsej 7 tendera nga institucione të ndryshme për pajisjen me karikues elektrik, që vërteton se interesimi për këtë teknologji është në rritje dhe po bëhet gjithnjë e më i përhapur.
Sipas të dhënave nga Drejtoria e Përgjithshme e Shërbimeve të Transportit Rrugor, vetëm në 10 muajt e parë të vitit 2024 janë importuar rreth 2500 automjete elektrike, një shifër që tregon një trend në rritje të përdorimit të këtyre automjeteve.
Kjo rritje ka bërë që shumë kompani dhe individë të investojnë në blerjen e makinave elektrike, të cilat ofrojnë përfitime të shumta si kosto të ulëta operative, komoditet gjatë udhëtimeve, ndotje më të ulët dhe lehtësira në pagesat e taksave.
Në këtë kuadër, fluksi i pikave të karikimit është fokusuar kryesisht në kryeqytet, ku kërkesa është më e lartë. Sidoqoftë, një pjesë e konsiderueshme e këtyre pikave janë instaluar në stacionet e taksive, të cilat tashmë janë një ndër përdoruesit kryesorë të makinave elektrike.
