Parku Detar Kombëtar Sazan-Karaburun, i vetmi i këtij lloji në Shqipëri, vijon të tërheqë një numër të madh turistësh vendas dhe të huaj gjatë sezonit turistik. Ky destinacion natyror unik ofron një eksperiencë të veçantë për vizitorët, të cilët udhëtojnë me anije nga porti i Vlorës për të eksploruar bukuritë e tij natyrore dhe kulturore.
Agjencia Telegrafike Shqiptare duke iu referuar të dhënave të Kapitenerisë së portit të Vlorës, shkruan se gjatë muajit qershor parku është vizituar nga 8 mijë e 876 turistë, ndërsa në korrik pritet të vazhdojë fluksi i lartë i vizitorëve.
“Për muajin qershor ky park u vizitua nga 8876 turistë vendas e të huaj. Edhe gjatë korrikut ka një numër të lartë vizitorësh jo vetëm vendas, por edhe nga vende të ndryshme të Evropës dhe botës”, është përgjigja e Kapitenerisë së Portit të Vlorës.
Në total, 12 anije turistike të licencuara operojnë nga porti i Vlorës, duke ofruar udhëtime të rregullta drejt këtij parku të mrekullueshëm.
Parku Detar Sazan-Karaburun shtrihet në një zonë prej rreth 1.9 km në det dhe përfshin shumë atraksione natyrore si Shpella e Haxhi Aliut, që është ndër më të vizituarat, Gjiri natyror dhe kulturor i Gramës dhe ishulli i Sazanit, që është dhe atraksioni kryesor i parkut. Për vizitorët që kërkojnë qetësi dhe relaks në natyrë, brigjet e Shën Vasilit, Shën Janit dhe Gjirit të Djallit ofrojnë peizazhe të jashtëzakonshme dhe një eksperiencë të paharrueshme.
Ky park është gjithashtu habitat i shumë specieve të rralla, duke përfshirë breshkën e detit, fokën e Mesdheut, delfinët dhe peshkaqenët, duke e bërë atë një zonë të rëndësishme ekologjike dhe turistike për Shqipërinë.
Në përgjithësi, Parku Detar Kombëtar Sazan-Karaburun po afirmohet si një nga destinacionet kryesore natyrore në vend, duke kontribuar ndjeshëm në zhvillimin e turizmit lokal dhe promovimin e bukurive natyrore të bregdetit shqiptar.
