Numri i azilkërkuesve nga Shqipëria drejt Gjermanisë vijon të rritet. Zyra për Emigrantët dhe Refugjatët në Gjermani ka publikuar shifrat për qershorin, të cilat tregojnë se 5 932 shqiptarë aplikuan për azil këtë muaj.
Me këtë numër kërkesash, azilkërkuesit shqiptarë renditen në vendin e dytë, pas atyre sirianë me 7562 kërkesa. Në krahasim me muajin e kaluar janë shënuar rreth 1 mijë kërkesa më shumë nga shtetasit shqiptarë dhe rreth 3 mijë më shumë nga prilli.
Për gjysmën e parë të këtij viti, autoritetet gjermane kanë regjistruar mbi 22 mijë kërkesa për azil nga shqiptarët, rreth 19 mijë më shumë se e njejta periudhë e vitit 2014. Nëse bëhet krahasimi për të njejtën periudhë të dy viteve, vetëm Kosova ka rritje të tillë drastike me rreth 27 mijë kërkesa më shumë.
Edhe fluksi i kërkesave për azil nga Kosova është sërish në rënie. Për qershorin janë regjistruar 366 kërkesa më pak, krahasuar me muajin pararendës. Kosova renditet në vendin e 6 të listës së Ministrisë së Brendshme Gjermane.
Për muajin qershor, autoritetet gjermane regjistruan 35 449 kërkesa për azil. 35.7% të totalit të tyre e përbëjnë kërkesat nga shtetasit e Ballkanit Perëndimor. Numri i tyre ka rënë krahasuar me Majin, kur kërkesat nga ky rajon përbënin 41.3% të totalit.
