Çmimi i naftës në pikat e karburanteve në vend ka shënuar një tjetër rritje, duke arritur në rreth 214 lekë për litër, nga 206 lekë për litër që ishte më parë.
Rritja vjen në një kohë kur Bordi i Transparencës nuk është më funksional, pasi është shpërbërë, duke lënë përcaktimin e çmimeve në dorë të tregut.
Kjo rritje ndodh në një periudhë kur çmimi i naftës në bursat ndërkombëtare ka shënuar një ulje me rreth 11% gjatë ditëve të fundit.
Për drejtuesit e mjeteve, rritja e vazhdueshme e çmimit të karburantit është e pajustifikuar dhe pritet të sjellë efekte zinxhir edhe në rritjen e çmimeve të produkteve dhe shërbimeve të tjera.
“Është shumë lart. Nuk përballohet. Duhet që qeveria të marrë masa. Nga kjo fillojnë të githa problemet. Rritja e çmimeve nga nafta fillon. Është një ngërç që duhet të zgjidhet patjetër”, thotë një qytetar.
Nga një vëzhgim në subjektet që tregtojnë fruta dhe perime në qytetin e Korçës nuk vihet re një rritje e ndjeshme e çmimeve si pasojë e shtrenjtimit të naftës. Sipas tregtarëve, shumë prej produkteve janë aktualisht më të lira, pasi janë prodhime të sezonit. Ndërkohë, rritje të çmimeve kanë pësuar produktet jashtë sezonit, si edhe ato që vijnë nga importi.
“Ato që vijnë nga jashtë janë më të shtrenjta”, thotë një tregtare.
Qytetarët shprehen se tregu i karburanteve duhet të ketë një mekanizëm rregullues, në mënyrë që të shmangen rritjet abuzive të çmimeve, të cilat ndikojnë drejtpërdrejt në ekonominë familjare dhe në gjithë zinxhirin e konsumit.
vizionplus.tv
