Hyrjet e shtetasve të huaj në Shqipëri në tremujorin e parë 2015 janë 487.271 shtetas, krahasuar me të njëjtën periudhë të vitit 2014 numri i tyre është rritur me 1,3 %, ndërkaq daljet e shtetasve shqiptarë janë 870.066 shtetas duke shënuar një rritje prej 1,9 %.
Numri i vizitorëve të huaj që kanë hyrë për pushime dhe vizita ditore në këtë tremujor rezulton 47.646 vizitorë, ndërsanë të njëjtin tremujor të një viti më parë ky numër ishte 58.893 vizitorë. Në tremujorin e parë 2015, hyrjet e vizitorëve të huaj në strukturë sipas mënyrës së udhëtimit në rrugë tokësore zënë peshën më të madhe me 84,4 %, ndërsa hyrjet në rrugë ajrore dhe detare zënë respektivisht 12,9 % dhe 2,7 %.
Në Shqipëri numri i vizitorëve të huaj që hyjnë për qëllime personale në këtë tremujor është 477.729 vizitorë dhe përbëjnë 98 % të numrit gjithsej të vizitorëve. Këtu përfshihen vizitat për pushime, vizita te të afërm dhe miq, vizita shëndetësore, fetare etj. Krahasuar me të njëjtën periudhë të 2014, numri i vizitorëve për qëllime personale është rritur 1,1 %.
Vizitorët për qëllime biznesi përbëjnë 2 % të numrit gjithsej të vizitorëve të huaj. Në këtë tremujor numri i shtetasve të huaj që vizitojnë Shqipërinë nga rajoni i Evropës është 451.889 vizitorë dhe përbën 92,7 % të numrit gjithsej të vizitorëve. Numri i vizitorëve nga vendet e Evropës Perëndimore është 20.663 vizitorë, krahasuar me tremujorin e parë 2014 është rritur me 26,3% ndërsa numri i vizitorëve të ardhur nga vendet e Evropës Jugore është 402.459 vizitorë dhe është ulur me 3.4 %.
