Ditët e para të kësaj jave, kanë sjellë temperatura të larta në gjithë territorin e e Kosovës, duke sjellë edh epasoja në shëndetin e fëmijëve, të moshuarve, grave shtatzëna dhe të sëmurëve kronikë.
Një numër i konsiderueshëm personash kanë kryer vizita mjekësore në Qendrën Familjare apo Klinikën Emergjente në kryeqytet.
Drejtori i Klinikes Emergjente, Basri Lenjani, tha për KosovaPress se këto ditë emergjenca po shënon një numër të madh të personave, të cilët kanë pasur probleme shëndtësore mga temperaturat e larta. Klinika Emergjente po përdor planin B për ngritjen e kapaciteteve hapësinore në sigurinë e ilaçeve, si dhe ekipet shtesë në gatishmëri në raste të fluksit të madh të sëmurëve që kërkojnë shërbime emergjente”.
“Brenda 24 orëve në Klinikën Emergjente kërkuan ndihmë rreth 200 të qytetarë, ku 70% e tyre janë vizituar kryesisht për shkak të temperaturave të larta dhe përkeqësimit të shëndetit, ndërsa 30% si pasojë aksidentet rrugore”, u shpreh Lenjani.
Drejtori Lenjani jep disa këshilla për orët e nxehta të ditës. “Fëmijët e vegjël, personat e moshuar dhe ata me sëmundje kronike nga ora 11:00 deri në ora 17:00 duhet të mos ekspozohen ndaj rrezeve të diellit, të jenë në ambiente të freskëta, të përdoren kondicionerët, të përdorin terapinë e koordinuar nga mjeku familjar apo nga mjeku specialist”.
Ai i bëri apel Qendrave Familjare që të gjitha ato rastet që kanë mundësi t’i trajtojnë në Qendrat e tyre, ndërsa vetëm ato raste me çrregullime të rënda t’i dërgojnë në Klinikën Emergjente. Instituti Kombëtar i Shëndetësisë Publike, para disa ditëve ka rekomanduar masat e mbrojtëse për shëndetin e personave të moshuar gjatë ekspozimit ndaj temperaturave të ajrit mbi 30°C. (java / r.a)
