Inspektori i Lartë i Drejtësisë, po përballet me një rritje të fortë të ankesave ndaj gjyqtarëve dhe prokurorëve, që qytetarët paraqesin pranë këtij institucioni. Nëse deri vjet, mesatarja e ankesave të dorëzuara në ILD, ka qenë diku te 80 në muaj, që nga fillimi i vitit ato thuajse janë dyfishuar. Ndërsa në janar, u administruan 120 ankesa, në fund të muajit prill, ato arritën në 160 të tilla.
Kjo situatë ka bërë që Inspektori i Lartë, Artur Metani, të mbledhë të mërkurën trupën e inspektorëve dhe Njësinë e ndihmës inspektorëve “për të diskutuar mbi rishikimin e proceseve të brendshme të punës dhe rritjen e eficencës për shqyrtimin e ankesave”.
ILD, ashtu si dhe institucione të tjera të Drejtësië, vuan numrin e e ulët të inspektorëve, më pak se gjysma e numrit të miratuar sipas organikës, ne për këtë arsye “në këtë takim pune u vlerësua si e nevojshme marrja e masave të tjera për të maksimizuar përpjekjet për trajtimin e një numri më të lartë ankesash, në mënyrë që të mos krijohet stok”.
“Trajtimi i ankesave të trashëguara, ka qenë një proces që ka tejkaluar ngarkesën normale të punës së ILD-së, për burimet njerëzore në dispozicion, por në sajë të masave rregullatore, administrative dhe strukturore të ndërmarra, rezultatet kanë qenë të dukshme dhe të matshme” deklaroi Metani gjatë takimit, duke nënvizuar se “tani duhet parandaluar krijimi i stokut institucional, në kushtet e rritjes së numrit të ankesave dhe të mosndryshimit të burimeve njerëzore, që mbeten të ulëta”.
Shumica e ankesave, janë pretendime për zvarritje të çështjeve ose vonesa në zbardhjen e vendimeve gjyqësore. Të paktën 134 magjistratë janë hetuar nga ILD-ja, e cila ka paraqitur 48 kërkesa për procedime disiplinore, si ndaj prokurorëve ashtu dhe ndaj gjyqtarëve.
