Në këto ditë të nxehta të korrikut, në rrugët e qytetit të Shkodrës ka shumë turistë të huaj, të cilët, nga pajisjet dhe çantat e udhëtimit që mbajnë, dallohen lehtësisht si adhurues të natyrës dhe turizmit të aventurës.
Shumë prej tyre qytetin e Shkodrës e kanë pikënisje për të eksploruar destinacionet malore më të njohura të veriut të vendit. Sipas operatorëve turistikë, prej disa javësh, thuajse çdo ditë dhjetëra turistë të huaj interesohen për itinerare dhe guida malore.
“Këtë vit e klientët janë shumë më shumë më të shumtë se vitet e tjera. Turistët vijnë prej gjithë botës. Kërkesa më të shumta prej turistëve kohët e fundit janë për të vizituar Thethi”, tha Emiljana Laçi, operator turistik.
Parku Kombëtar i Alpeve, me në qendër Thethin, si edhe Lumi i Shalës, mbeten destinacionet më të kërkuara nga vizitorët e huaj të cilët krahas peizazhit dhe mundësive për aktivitete në natyrë vlerësojnë edhe mikpritjen.
“Vijmë nga Belgjika dhe po kalojmë një tur të këndshëm në Shqipëri. Sapo jemi kthyer nga Thehi, ndërsa kemi vizituar edhe lumin e Shalës dhe liqenin e Komanit, vende vërtetë të manitshme. Përveç natyrës së mrekullueshme, na ka pëlqyer shumë edhe mikpritja e njerëzve si dhe çmimet e arsyeshme”, tha një turist.
“Ajo që na ka pëlqyer më shumë janë njerëzit, mikpritja dhe zonat malore. Deri më tani kemi vizituar Thethin dhe Valbonën, dy vende jashtëzakonisht të bukura që na kanë lënë mbresa shumë të mira”, u shpreh një turiste.
Të dhënat nga institucionet vendore tregojnë se gjatë kësaj periudhe, numri i vizitorëve në destinacionet malore të Bashkisë Shkodër, por edhe i akomodimeve afatshkurtër në qytet, është rritur me rreth 25 për qind krahasuar me të njëjtën periudhë të vitit të kaluar.
