Kina publikoi një plan për të ndërtuar një sistem modern të shërbimeve klimaterike deri në vitin 2030, me një fokus të fortë tek inovacioni dhe inteligjenca digjitale për t’i çuar fushat kryesore në nivele të klasit botëror, shkruan “Xinhua”.
Në planin e publikuar nga Administrata Meteorologjike e Kinës kërkohet që, gjatë periudhës së Planit të 15-të Pesëvjeçar (2026-2030), të bëhet përparim në pavarësinë teknologjike, operacionet e digjitalizuara, shërbimet e bazuara në skenarë dhe platformat e integruara për të përmirësuar shërbimet klimaterike.
Sipas planit, vendi do të krijojë një rrjet kombëtar-krahinor për ndarjen e të dhënave dhe një kornizë pune të koordinuar, në mënyrë që çdo përditësim i bërë të jetë menjëherë i disponueshëm në të gjithë sistemin.
Institucionet në nivel kombëtar do të marrin drejtimin në kërkimin dhe zhvillimin e teknologjisë, ndërtimin e platformave dhe vendosjen e standardeve. Ato gjithashtu do të zhvillojnë modele të sistemit të Tokës dhe mjete parashikimi klimaterike të bazuara në inteligjencën artificiale.
Gjatë pesë viteve të ardhshme, plani përshkruan 19 detyra prioritare që synojnë forcimin e pesë fushave, duke përfshirë monitorimin e sistemit të Tokës, parashikimin e pavarur të klimës dhe vlerësimin e rrezikut nga fatkeqësitë, shërbimet e fokusuara në sektorë, infrastrukturën bazë mbështetëse dhe reformat institucionale për zhvillim me cilësi të lartë.
Kina ka vënë në përdorim dronët për vëzhgimin e tajfuneve dhe modelet e paralajmërimit të hershëm të drejtuara nga inteligjenca artificiale. Nga këto mjete ka përfituar jo vetëm Kina, por edhe komunitetet në të gjithë botën, duke përmirësuar paralajmërimin e hershëm dhe përgatitjen për fatkeqësitë.
