Rriten çmimet e teksteve shkollore
Procesi i përzgjedhjes së teksteve shkollore mes mësuesve dhe prindërve u la në harresë. Sipas këtij procesi, mësuesit së bashku me prindërit duhet të zgjedhin një prej tre alternativave të testeve shkollore të propozuara për nxënësit e klasës së parë dhe të gjashtë.
Ky proces ka nisur që më 31 korrik, por duket se periudha e pushimeve ka pasur ndikimin e saj, duke sjellë edhe mungesë bashkëpunimi në përzgjedhjen e tyre.
Një tjetër fakt që vihet re këtë vit është edhe rritja e çmimit për tekstet shkollore. Shitja e teksteve shkollore për vitin e ri shkollor 2015-2016 do të bëhet në periudhën 25 gusht-13 shtator. Shitja e teksteve shkollore bëhet nga njësitë tregtare të shitjes së librave.
Në udhëzimin e MAS, i cili mban datën 12 qershor, përcaktohet se çdo shkollë, për periudhën 25 gusht-13 shtator 2015, u vë në dispozicion falas personave të ngarkuar nga shpërndarësit e rrethit (librashitësit), një ose dy klasa të sigurta për shitjen e teksteve shkollore me hologramën e MAS-it.
Veç teksteve të reja për nxënësit e klasave të para dhe të gjashta, librat shkollorë për klasat e tjera, pra tekstet për nxënësit nga klasa e 2-5 dhe nga klasa e 7-12, do të kenë një rritje të lehtë, e cila është llogaritur në bazë të inflacionit të vitit 2014.
Në katalogun e teksteve shkollore është përcaktuar se “çmimi për tekstet shkollore 2015, është indeksuar me vlerën e inflacionit 31.12.2014 referuar INSTAT-it, 0.7 për qind”.
