Kërkesa e LSI-së për përjashtimin e Kryeministrit Edi Rama nga punimet e Kuvendit është rrëzuar.
Byroja e Kuvendit, e mbledhur për të shqyrtuar kërkesën e opozitës vendosi 6 me 3 kundër kësaj kërkese.
Kërkesa u dorëzua të mërkurën dhe në të thuhej: “Duke marrë shkas nga sjellja në kundërshtim me rregulloren e Kuvendit të Kryeministrit Edi Rama, i cili në seancën plenare të datës 29 mars, me një gjuhë prej rrugaçi përdori fjalor fyes, përçmues e poshtërues ndaj deputetëve të Kuvendit dhe qytetarëve të Republikës së Shqipërisë ju drejtohemi me kërkesën për përjashtimin e tij nga Kuvendi”.
Deputetja e PS, njëherazi nënkrytare e Kuvendit, Vasilika Hysi u shpreh pas mbledhjes së Byrosë së Kuvendit se Rama ka cituar vargjet e një poezie gjatë seancës së Kuvendit. Ajo solli në vëmendje gjuhën e përdorur seancat e kaluara nga ish-kryeministri Sali Berisha i cili sipas Hysit ka fyer vazhdimisht gratë e Kuvendit. “Ishte një kërkesë e vonuar dhe një kërkesë e papargumentuar. Kryeministri ka cituar një poezi dhe nuk ka pasur për qëllim të fyejë”, tha Hysi.
Mazhoranca thotë se deklarata e Ramës ishte thjeshtë një “metaforë pa qëllim ofendues”.
Në daljen e tij për mediat për përfundimit të mbledhjes nënkryetari I partisë Demokratike Edi Paloka tha se byroja dha argumente idiote, madje kërkoi edhe dënimin e deputetëve të cilët shkruan kërkesën.
“Hysi kërkoi madje edhe dënimin e tyre që bënë kërkesën sepse sipas saj u fye kryeministri se ishte shkruar rrugaç.
Si përfundim morën vendimin se kryeministri është i pafajshëm. U quajt metaforë ajo që ai përdori. Nuk mundët qe një kryeministër të fyejë popullin duke e cilësuar me organin gjenital dhe këta nuk e dënojnë të paktën me mospranimin e tij në Kuvend.
Nuk presim gjë tjetër nga kjo qeveri. Jemi në një situatë ku opozita ka vendosur mosbindjen civile. Vetëm me përballje mund të marrin vesh këta që drejtohen nga ky”, tha Paloka.
a.ç
