Diskutimi në Komisionin e Ligjeve i nismës për të lejuar shitjen e produkteve me bazë kanabisin mjekësor, shërbeu që parlamentarët të ngrenë një tjetër shqetësim, atë të tullumbaceve me azot.
Droga e re, e cila po reklamohet në masë në rrjete sociale, ka shqetësuar deputetët, të cilët si rrallë herë dolën nga llogoret politike përballë një fenomeni që po dëmton më shumë fëmijët.
Entela Ramosaçaj, zëvendësministre e Shëndetësisë: Protoksidi i Azotit si bar mjekësor klasifikohet si substancë analgjetike që heq dhimbjen dhe jep efektin e narkozës dhe si i tillë është i lejuar vetëm të përdoret në spital. Bombolat që qarkullojnë me protokosid nuk janë të njëjta që përdoren në spitale. Pra, janë jo për përdorim mjekësor.
Shpjegimi mjekësor i efekteve të kësaj droge shqetësoi edhe më shumë deputetët. Përballë mungesës së bazës ligjore që do të mundësonte ndërhyrjen e policisë, deputetët shprehën gatishmërinë edhe për nisma konkrete ligjore.
Xhixho: Policia shkon i sekuestron nëpër lokale dhe nuk ka bazë ligjore. Kjo është një situatë e cila është shumë e rënduar, shumë shqetësuese.
Në fund, Komisioni i Ligjeve vendosi miratimin e nismës ligjore për lejimin e tregtimit të produkteve me bazë kanabisin mjekësor, ndërsa për çështjen e tullumbaceve me azot, u ra dakord që të merret më shumë informacion rreth situatës. /f.s
