Eksperti i sigurisë dhe marrëdhënieve ndërkombëtare, Redion Qiriazi, ka deklaruar në emisionin “3D” të Alban Dudushit në RTSH1 se presidenti amerikan Donald Trump po kërkon të krijojë kauza populiste para zgjedhjeve.
Sipas Qiriazit, Antifa nuk është një organizatë tradicionale me strukturë të qartë anëtarësie, por një konglomerat i lëvizjeve dhe individëve që ndajnë një ideologji të përgjithshme kundër ekstremit të djathtë, fashizmit dhe racizmit.
Ajo ka rrënjë historike që shkojnë deri në vitet 1920 në Europë dhe ka qenë e pranishme në SHBA për dekada, duke u aktivizuar në momente të ndryshme si protestat e inaugurimit të Trumpit në 2017, ngjarjet në Portland në 2020, sulmet ndaj qendrave të ICE-së në 2019 ose protestat në Atlanta në 2022.
“Tani duket sikur zoti Trump në fakt e ka patur këtë pjesën e Antifës një nga premtimet e tij elektorale dhe duket sikur e mbajti duke e designuar këtë si organizatë terroriste”, thotë Qiriazi.
Megjithatë, ai thekson se kjo qasje është problematike sepse qëllimi politik i Antifës është relativisht difuz dhe ambig: “ndryshon me kohërat, pra në qoftë se tani është çështja e racizmit, nesër pasnesër mund të jetë një element tjetër i ekstremit të djathtë”.
Qiriazi e lidh kohën e kësaj iniciative me zgjedhjet e mesmandatit (mid-term).
“Pse vjen kjo në këto momente? Unë mendoj se zoti Trump ka dëshirën që të trazojë atë çanakun dhe si rrjedhojë e kësaj ka zgjedhjet e mid-term. Është për të cilën mund të diskutohet. Mund t’i lejojë atij që të krijojë, të grumbullojë kauza dhe të grumbullojë kapital politik”, u shpreh ai.
Sipas tij, temat jo të moderuara janë pikërisht ato që preferon Trump, sepse mbi to ndërton populizëm me efektshmëri të lartë.
Në përfundim, sipas ekspertit, veprimet e Trumpit ndaj Antifës duken më shumë si një lëvizje politike për të grumbulluar kapital elektoral sesa një strategji sigurie e bazuar në analizë të thellë të kërcënimit real, duke pasur parasysh natyrën e difuzë të kësaj lëvizjeje.
