Një operacion i policisë së Tiranës i koduar “Prita” ka vënë në pranga një person me precedent të theksuar kriminal, i dënuar për disa vepra penale, i akuzuar për disa vjedhje.
Efektivët e komisariatit Nr. 2 Tiranë, në vijim të punës për kapjen e personave të shpallur në kërkim, kanë marrë informacione se një shtetas i kërkuar po lëvizte në rrugën “Besim Alla”, dukje bërë rrethimin i zonës ku dyshohej se fshihej dhe mund të lëvizte ky shtetas.
Pas disa orësh mbajtjeje nën kontroll të zonës, rreth orës 01:15 të mëngjesit të sotëm, shërbimet e policisë kanë konstatuar në rrugën “Besim Alla”, të dyshuarin i cili po tentonte të vidhte një motor me qëllim që të largohej.
Si rezultat i rrethimit të zonës, uniformat blu në bashkëpunim me forcën e posaçme “Shqiponjat” dhe me komisariatin e policisë Nr. 6 u bën arrestimin në flagrancë të Edison Canaj, 34 vjeç, banues në Tiranë.
I arrestuari rezulton i dënuar më parë për veprat penale “Vjedhja”, “Heqja e paligjshme e lirisë”, “Vjedhja me dhunë”, “Plagosja e lehte me dashje”, “Armëmbajtja pa leje”.
Canaj ishte shpallur në kërkim nga Komisariati i Policisë Nr. 6, pasi Gjykata e Rrethit Gjyqësor Tiranë i ka caktuar masën e sigurimit “Arrest në burg”, për veprën penale “Vjedhja me dhunë”.
34-vjeçari dyshohet se është autor edhe i disa vjedhjeve të tjera të ndodhura më parë dhe vijon puna për dokumentimin e tyre, ndërkohë që për veprime të mëtejshme ndaj tij, materialet iu referuan Prokurorisë së Tiranës.
/a.r
