Korporata Elektroenergjetike Shqiptare hapi procedurën për importin e energjisë në muajin tetor. Në dokumentet e kësaj procedure rezulton se kërkohet një sasi edhe më e lartë se në muajin paraardhës.
Në të njëjtën ditë, duket se edhe OSHEE ka shpallur procedurën e importit, por duke kërkuar përveç plotësimit të sasisë që duhet për tetorin edhe sigurimin e ofertave për nëntorin e dhjetorin.
KESH është duke përdorur për importet transhin e dytë të kredisë me Bankën Botërore e cila përmes programit të Rimëkëmbjes ka një fond prej 22.4 milionë euro vetëm për rastet e emergjencës.
Në total sasia që do të importohet nga ana e KESH është 134 milionë kilovatorë, kurse pjesa tjetër që duhet për të plotësuar furnizimin në vend do të bëhet nga ana e OSHEE-së.
KESH në shtator kërkoi të importonte 129 milionë kilovatorë energji ndërkohe që në mbyllje të procedurës u importuan vetëm 115 milionë, me një çmim mestar prej 62.33 euro/MË dhe shuma totale e shpenzuar ishte 7.18 milionë euro.
Situata e thatësirës së këtij viti vuri në vështirësi kompanitë e sektorit energjetik ku peshën kryesore e mbajti OSHEE duke importuar me fondet e veta ndërkohe që KESH kishte në punë HEC-et në kaskadën e Drinit duke përpunuar vetëm prurjet minimale.
Importet nga qershori deri më tani u kanë kushtuar në total 90 milionë euro ndërkohë që kjo shifër pritet të rritet pas përfundimit të procedurave të tetorit nga KESH dhe OSHEE.
a.ç
