Roja bregdetare greke është në kërkim të 50 të zhdukurve pas mbytjes së anijes që ndodhi pasi anija u largua nga Turqia të martën duke u nisur për në Itali. Përpjekjet e shpëtimit përfshinin katër anije që tashmë po lundronin në Egjeun jugor, dy varka patrullimi të rojes bregdetare dhe një helikopter të forcave ajrore greke.
Megjithatë, erërat e forta deri në 50 kilometra në orë (30 mph) po pengonin operacionin, tha zëdhënësi i rojes bregdetare, Nikos Kokalas për radion Skai. Greqia është shpesh vendi i zgjedhur për emigrantët që ikin nga Afrika dhe Lindja e Mesme, në përpjekje për të arritur një jetë më të mirë në Bashkimin Evropian.
Shumë vijnë në Greqi nëpërmjet Turqisë mbi kalimin e ngushtë dhe të rrezikshëm detar që ndan armiqtë tradicionalë. Gjashtëdhjetë e katër persona kanë vdekur në Mesdheun lindor që nga janari, thotë Organizata Ndërkombëtare për Migracionin. Tetë persona vdiqën në ishullin grek të Mykonos më 19 qershor, kur 108 të tjerë u shpëtuan, sipas organit të migracionit të OKB-së.
Athina thotë se numri i mbërritjeve të emigrantëve është rritur këtë vit dhe akuzon Ankaranë se nuk ka bërë mjaftueshëm për të ndaluar kontrabandistët që t’i dërgojnë ata përtej kufirit — shpesh me varka të dobëta që bëjnë udhëtime të rrezikshme. Turqia u zotua në bazë të një marrëveshjeje të vitit 2016 për të ulur numrin e emigrantëve që largohen nga brigjet e saj në këmbim të ndihmës financiare nga Bashkimi Evropian.
Në fund të qershorit, BE-ja i kërkoi Ankarasë të ndalojë “përzëniet e dhunshme dhe të paligjshme” nga territori i saj. Grupet bamirëse dhe media akuzojnë Athinën për kthimin e paligjshëm të emigrantëve, një akuzë që qeveria konservatore greke e mohon.
/e.d
