Interesimi i mediave vendore, të Shqipërisë dhe atyre ndërkombëtare për të përcjellë ndeshjen Kosovë – Kroaci, është i madh.
Është bërë e ditur se në adresë të Federatës së Futbollit të Kosovës kanë shkuar rreth 400 kërkesa për akreditim, shkruan “Koha Ditore”. Por, jo të gjitha do të aprovohen.
Në këtë grup ka edhe shumë media lokale, që do të vijnë vetëm të fundit në radhë për shqyrtim. “Nuk është për t’u habitur që ka interesim të madh nga mediumet në Kosovë dhe Shqipëri për ta përcjellë këtë ndeshje, por nuk kam pritur që kaq i madh të jetë interesimi edhe i mediave botërore.
Mbulimi nga mediumet i jep rëndësi kësaj loje që është unike, pasi kemi përballë një përfaqësuese të madhe në ndeshjen e dytë.
Do të varet sa është kapaciteti, por do të tentojmë që ta bëjmë hapësirën maksimale, sepse mediumet e kanë rolin e vet”, ka thënë sekretari i përgjithshëm i FFK-së, Eroll Salihu, përgatiti Express. (b.an)