Miratohet paketa e ndryshimeve në Kodin Penal
Pas një seance plenare që zgjati rreth 18 orë, Kuvendi i Shqipërisë ka miratuar paketën e ndryshimeve në Kodin Penal me 85 vota pro.
Ministri i Drejtësisë, Besfort Lamallari, e cilëson vendimin si një avancim të rëndësishëm në forcimin e shtetit të së drejtës dhe në adresimin e problematikave që lidhen me sigurinë publike, kontrollin e territorit, pastrimin e parave, trafikimin e qenieve njerëzore dhe terrorizmin.
Sipas Lamallarit, ndryshimet e miratuara përmbushin gjithashtu detyrimet që rrjedhin nga procesi i integrimit europian, përmes përafrimit të 7 akteve kyçe të Acquis communautaire.
Ai thekson se sfida e radhës mbetet hartimi i një Kodi të ri Penal, proces që, sipas tij, po zhvillohet me transparencë dhe gjithëpërfshirje, ndërsa puna vijon për mbledhjen e kontributeve dhe reflektimeve më të mira në funksion të reformës.
Debate edhe për Kodin Penal, kritika nga opozita
Një tjetër çështje që ka ndezur debate mes palëve janë edhe ndryshimet e propozuara në Kodin Penal.
Opozita ka kritikuar ashpër amendimet, të cilat sipas saj prekin qytetarët për shkelje të lehta, ndërsa abuzimet me fondet publike nuk po trajtohen me të njëjtën ashpërsi.
Në kundërpërgjigje, Ministria e Drejtësisë tha se ndryshimet e propozuara kanë marrë bekimin e Brukselit, pasi janë konsultuar me autoritetet e Bashkimit Europian.
Në agjendën e seancës që vijon ende janë 18 projektligje, marrëveshje dhe një akt normativ për ndryshimin e buxhetit, por me kërkesën e Ballës, 4 projektligje u kaluan për shqyrtim javën e ardhshme për t’u dhënë më shumë kohë ligjvënësve të përfshijnë edhe sugjerimet që vijnë nga Komisioni Europian.
