Ekskluzive Javanews/ Gazeta prestigjioze Nju Jork Tajms ka botuar një anë të errët të vdekjes në vitin 2012 të Neil Armstrong, njeriut të parë që shkeli në Hënë. Këto ditë bota përkujtoi 50 vjetorin e njërës ndër ngjarjet më të mëdha të shekullit të 20-të, zbritjes për herë të parë të njeriut në satelitin e Tokës, shkruan Javanews.
Por fundi i jetës së Armstrong, njërit ndër personazhet më të nderuar dhe më të famshëm në SHBA, nuk ka qenë po aq i lavdishëm, sipas zbulimeve më të fundit. Nju Jork Tajms tregon se në vitin 2012 Neil Armstrong u shtrua në një spital të Ohajos, dy javë para se të vdiste, më 25 gusht. Për shkak të disa problemeve kardiake atij i vunë një aparaturë që maste ritmin e zemrës. E shoqja thotë se pas atij momenti Neil u bë mirë, filloi të ecte në korridor dhe mjekët menduan t’ja hiqnin aparaturën.
Dhe këtu nis ana e errët e një historie tronditëse, e cila përfshin mjekët dhe familjen e Armstrong. Gjatë heqjes së aparaturës, aksidentalisht stafi mjekësor çau një membranë që mbronte zemrën e astronautit të famshëm, informon Javanews. Komplikacionet që rrodhën më pas bënë që Armstrong të vdiste tragjikisht dhe e gjitha u mbajt e fshehur, duke komunikuar për publikun si shkak të vdekjes “komplikacioneve postoperatore”. Pra, njeriu i famshëm i zbritjes në Hënë vdiq nga një aksident banal spitalor.
Por e vërteta ishte se gabimi njerëzor që u bë gjatë heqjes së pacemaker (aparati i matjes së ritmit kardiak), u mbulua nga spitali dhe mbi të gjitha u mbajt sekret pas kërkesës së familjes për të marrë 7 milion dollarë dëmshpërblim, në këmbim të heshtjes. Një valle e gjatë negociatash mes avokatëve të spitalit dhe familjes konkludoi me dhënien nga ana e institucionit në fjalë të një shume prej 6 milion dollarësh. Të cilët, sipas Nju Jork Tajms, u ndanë në këtë mënyrë: 5.2 milion u morën nga dy djemtë Dean dhe June, 250 mijë nga vëllai dhe motra e Neil Amstrong, 24 mijë ju dhanë secilit prej gjashtë nipërve. Kurse gruaja e dytë e Armstrong Carol nuk pranoi të merrte para, njofton Javanews.
Këto dëshmi rrënqethëse ju dhanë Nju Jork Tajms përmes një dokumenti prej 93 faqesh që dërgoi në redaksi një i panjohur. Pas verifikimeve, gazetarët konkluduan se historia është e vërtetë. Kështu mbaroi jeta e njërit prej pionierëve më të shquar të shekullit të njëzetë: me një grusht parash nën dorë për familjarët që heshtën për fajin e mjekëve të papërgjegjshëm!
Gerti Kosovari
Javanews
