Muharrem Hoxha, i njohur nga të gjithë si Rrema i estradës së Durrësit, ka zbuluar në një intervistë me gazetën Panorama se dikur përndiqej nga Sigurimi, për shkak se vinte nga një familje e persekutuar. Tani ka dalë në pension, pas 40 vitesh karrierë, për të cilën u nderua me titullin “Mjeshtër i Madh”.
Rrema ka pasur një xhaxha në burg, çka i ka prishur biografinë dhe si rezultat iu deshën shumë vite për t’u futur në estradën e Durrësit.
Humoristi e ka nisur me estradën amatore, ku, siç thotë, survejimi nuk ishte në maksimum.
“Në fakt, ka pasur njëfarë tolerimi, sepse Sigurimi i Shtetit na konsideronte amatorë dhe nuk na kushtonte shumë vëmendje, por ka pasur raste kur më kanë “tërhequr” veshin. Trupa amatore nisi të fitonte terren kundrejt trupës profesioniste, dhe Pallati “Rinia” mbushej gjithnjë e më shumë. Është e vërtetë që këndohej muzikë moderne, por nuk ekzagjerohej. Tre-katër herë më kanë thërritur ata të Sigurimit, sepse dilja pak nga skenari. Unë isha tifoz i madh futbolli dhe sajoja ndonjë gjë aty për aty në lidhje me ndeshjen e fundit që ishte zhvilluar. Kjo pëlqehej shumë nga publiku, por jo nga Sigurimi i Shtetit, aq më tepër që unë vija nga familje e persekutuar dhe një xhaxha e kisha në burg. Por, fatmirësisht, drejtor i Pallatit “Rinia” ishte Enver Plaku, që ishte amortizatori mes meje dhe Sigurimit të Shtetit. Ai i zgjidhte këto punët e mia të “pista”. Më ka ndihmuar shumë”.
Në lidhje me pengesën për shkak të biografisë, Rrema tregon:
“Unë gjithnjë e kam marrë jetën me sportivitet, por mendoj se biografia ka ndikuar. Mbaj mend, në vitin 1974, Fadil Hasa ishte sëmurë dhe do ta zëvendësoja unë. Bëhet fjalë për Estradën profesioniste. Unë mora rolin kryesor, të këpucarit. Gjithçka shkoi shumë mirë për mua, por edhe si shfaqje. Por kur mbaroi shfaqja, më thanë që “ti ke xhaxhain në burg, prandaj nuk do të vazhdosh këtu në estradën profesioniste”. Pjesë e saj, unë u bëra vetëm në vitet ’89-’90, kur forca e komunizmit po venitej”.
