Ministri i Brendshëm Saimir Tahiri ka firmosur një rregullore të re për organizimin dhe funksionimin e marrëdhënieve brenda dhe jashtë strukturave të Policisë së Shtetit. Ajo që të bie në sy në rregullore është se uniformave blu u kërkohet ruajtja dhe administrimi i informacioneve konfidenciale dhe sekrete si dhe bërja kujdes në shkëmbimin e mesazheve dhe komunikimit mes policisë.
“Ruajtja e sekretit të shërbimit është detyrë e përhershme e çdo Punonjësi të Policisë së Shtetit. Çdo punonjës i Policisë së Shtetit detyrohet të njihet me rregullat e ruajtjes së sekretit të shërbimit dhe me dokumentet përkatëse. Punonjësit të Policisë së Shtetit i ndalohet të bisedojë çështje të karakterit sekret, në prani të personave të tjerë që nuk i takon të njihen me përmbajtjen e tyre”, thuhet në rregullore, raporton gazeta “Sot”
Po ashtu, punonjësve të Policisë së Shtetit u kërkohet të mbajnë uniformën pastër, të mos ngacmojnë ferma, të mos pinë alkool si dhe të mos luajnë bixhoz.
“Punonjësi policisë mban uniformën në rregull, të pastër, pa deformime dhe vishet në mënyrë të përshtatshme, gjatë kryerjes së detyrës/shërbimit, kur nuk kërkohet mbajtja e uniformës. Nuk konsumon alkool, në asnjë rast gjatë ushtrimit të detyrës. Nuk përdor në asnjë rrethanë lëndë narkotike. I ndalohet pirja e duhanit gjatë shërbimit. I ndalohet të luajë bixhoz ose lojëra fati gjatë shërbimit. I ndalohet përfshirja në punë të dyta, të cilat bien ndesh me detyrën. Raporton menjëherë tek eprori i drejtpërdrejtë çdo rast të procedimit ligjor të ndërmarrë ndaj tij, si dhe kur të afërmit dhe rrethi i ngushtë shoqëror, akuzohen për krime të rënda. I ndalohet në çfarëdolloj mënyre, forme dhe mjeti, të ngacmojë seksualisht qytetarët, kolegët, eprorët apo vartësit”, thuhet më tej në rregullore.
Një tjetër pikë e rendësishme në rregullore janë edhe rrjetet sociale, ku uniformat blu duhet të jenë të kujdesshëm në përdorimin e rrjeteve sociale.
Sipas rregullores punonjësi i policisë i përdor rrjetet sociale në mënyrë të kufizuar dhe me përgjegjshmëri, duke siguruar që publikimet në rrjetet sociale të mos perceptohen nga kolegët ose publiku si akte fyese, diskriminuese, viktimizuese apo në kundërshtim me parimet etike të sanksionuara në këtë rregullore.
“Punonjësi i Policisë nuk shpreh asnjë qëndrim politik mbi çështje me karakter sensitiv për publikun, që janë duke u trajtuar nga ana e Policisë së Shtetit. Gjatë përdorimit të rrjeteve sociale, punonjësi i Policisë nuk jep informacion në mënyrë të drejtpërdrejtë apo të tërthortë, që lidhet me veprimtarinë sekrete të punës së Policisë. Ai detyrohet të ruajë konfidencialitetin gjatë dhe pas përfundimit të ushtrimit të funksionit/detyrës”, theksohet në rregullore.
