Vajza 23-vjeçare që i shpëtoi sulmit me thikë të babait të saj ka rrëfyer për policinë momentet e tmerrit që kaloi mbrëmjen e djeshme, në banesën në rrugën “Jordan Misja”, ku Kujtim Ibraj 57 vjeç qëlloi për vdekje të bijën 17-vjeçare.
Mosmarrëveshjet në familje e kanë çuar nënën e fëmijëve të bëjë kërkesë për divorc me bashkëshortin Kujtim Ibraj, divorc i cili u firmos dy ditë më parë nga Gjykata e Tiranës. Çifti kishte 6 fëmijë, 4 vajza dhe dy djem, e meqë nuk kishte ku të shkonte, bashkëshortja pranoi që në një dhomë të shtëpisë së tyre të qëndronte ish-bashkëshorti.
Esmeralda Ibraj tha se babai i tyre konsumonte vazhdimisht alkool dhe i shqetësonte shpesh. Vajza rrëfeu se mbrëmjen e djeshme babai ishte grindur me nënën dhe motrën e saj dhe më pas nxori një thikë duke qëlluar mbi të dyja vajzat.
“Babai jeton në një pjesë të shtëpisë sonë. Ai vetëm pi, na shqetësonte vazhdimisht. Nuk e denonconim, se na vinte zor. Dje hyri në shtëpi, u grind me nënën dhe motrën. Kur i thamë se do ta largonim fare, mori thikën”, deklaroi vajza.
Sipas fqinjëve, dy vajzat e familjes Ibraj ishin të fejuara dhe shumë të urta, ndërsa ditët e fundit dëgjonin Kujtim Ibrajn t’i shante me zë të lartë nëpër lagje. E njëjta situatë ndodhi dhe të dielën mbrëma. Në gjendje të pirë Kujtim Ibraj ka filluar të shajë vajzat e tij e më pas ka marrë një automatik dhe është futur në dhomën ku po rrinin për t’i qëlluar.
Automatiku nuk shkrepi e në këtë moment Elidona 17-vjeçare ka lajmëruar në telefon policinë, duke i thënë se i ati po i vriste. Pikërisht në këto momente Kujtim Ibraj ka hedhur automatikun dhe rrëmbeu një thikë duke ia ngulur pa mëshirë së bijës 17-vjeçare.
Esmeralda, është futur për t’ia hequr të motrën nga duart babait përbindësh, por ka marrë dhe ajo plagë thike, fatmirësisht është jashtë rrezikut për jetën. Policia mbërriti menjëherë në vendngjarje, ndërsa ka arrestuar Kujtim Ibrajn si dhe ka marrë si provë mjetin me të cilin ai kreu krimin.
