Në një intervistë të dhënë për emisionin “Sky Football Night”, trajneri italian e pranon se është një njeri shumë ambicioz që kërkon të fitojë përherë. Rrëfimi i ti i shoqëruar me ironinë e zakonshme, karakteristikë e krahinës së Venetos, fillimisht ai ndalet te karriera e tij si trajner.
“Nuk nxehem shpesh herë tani, por në të shkuarën kam qenë shumë impulsiv. Kur një arbitër gabonte isha gati të protestoja por tani reflektoj më shumë. Me kalimin e kohës jam bërë më pak supersticioz. Kam kuptuar se të gjitha ritet përpara ndeshjes të cilave u dedikohesha dhunonin inteligjencën time, prandaj kam hequr dorë”, është shprehur De Biasi. Ai është një njeri që nuk dorëzohet kurrë sepse objektiv të vetëm ka fitoren.
“Në shkollë kur binte zilja e mbarimit të orës unë dhe të gjithë shokët nxitonim për të dalë, por unë bëja gjithçka që të dilja nga dera i pari. Ishte një fiksim dhe vazhdon të jetë i tillë. Mes një femre dhe një presidenti është shumë e thjeshtë të fitosh një president, sepse mjafton të dalësh me sukses nga një ndeshje dhe bën që ai të mbajë krahun tënd. Gjithsesi, nëse humbet, gjithçka bëhet më e komplikuar, por nuk mund të bëhet krahasimi me femrat”, ka thënë trajneri i Kombëtares, citon Supersport.al.
Një intervistë që rrëfen disa nga anët e panjohura të karakterit të trajnerit kuqezi, i cili ka bërë një koment të shkurtër edhe për Kombëtaren Shqiptare në një intervistë dhënë për radion “Kiss Kiss” Napoli duke u shprehur se ekipi që ai drejton duhet të luftojë shumë pasi ndodhet në një grup të vështirë dhe shumë kompleks.
