Gjatë periudhës së pandemisë Covid-19, neurokirurgu i njohur shqiptar në Spanjë Kita Sallabanda u bë një nga mjekët që këshillonte më së shumti qytetarët se si të ruheshin nga virusi.
Sallabanda ishte i ftuar në emisionin Opinion me Blendi Fevziun në Tv Klan ku zbuloi përse ai jeton dhe punon në Spanjë prej shumë vitesh tashmë.
Mjeku i njohur tregoi se nëna e tij është spanjolle. Ajo u largua nga Spanja gjatë Luftës Civile në atë vend dhe u vendos në Rusi. Aty u njoh me babain shqiptar të Kita Sallabandës që kishte shkuar për të studiuar, dhe më pas u kthyen të dy së bashku në Shqipëri.
Blendi Fevziu: Çne nëna juaj spanjolle e gjendur në Shqipëri? Një nga 4 spanjollet që gjendeshin këtu. Cila është historia e familjes?
Kita Sallabanda: Nëna ime është ajo që quhet një nga vajzat. Gjatë Luftës Civile shumë fëmijë spanjollë u larguan nga Spanja, një pjesë vajtën në Francë.
Blendi Fevziu: Si u gjend nëna juaj në Shqipëri?
Kita Sallabanda: Vajti në Rusi. Nënës time i takoi që të shkonte në Rusi, ishte një nga ata fëmijët spanjollë që vajtën në Rusi gjatë Luftës Civile.
Blendi Fevziu: Nga Spanja në Rusi? Pra e dërguan në Rusi për të mbijetuar nga lufta?
Kita Sallabanda: Vajtën me qindra fëmijë. Atje studio dhe u njoh me babain tim që shkonte për të studiuar në Rusi në Fakultetin e Tekstilit. Nëna ime është inxhiniere tekstili, u kthyen të dy në Tiranë.
Blendi Fevziu: Po nëna e kishte ruajtur nënshtetësinë spanjolle dhe në Rusi?
Kita Sallabanda: E kishte ruajtur nënshtetësinë spanjolle. Në fakt rusët ia hoqën sepse e mbajtën me nënshtetësi ruse. Pastaj ajo erdhi si ruse në Shqipëri.
Blendi Fevziu: Në çfarë moshe ishte larguar nga Spanja drejt Rusisë?
Kita Sallabanda: Ishte larguar në moshën 8 vjeç.
Blendi Fevziu: Kishte kujtimet e Spanjës?
Kita Sallabanda: Patjetër dhe mbante lidhjet me Spanjën sepse tezja ime e kërkonte nëpërmjet Kryqit të Kuq. Pastaj e kontaktuan nëpërmjet Kryqit të Kuq kur ishte në Rusi dhe pastaj kur ishte në Shqipëri përsëri.
Blendi Fevziu: Dhe ajo u njoh me një shqiptar dhe erdhi në Shqipëri. Pra, nëna juaj spanjolle që kishte jetuar si sovjetike dhe më pas u bë shqiptare. Dhe jetoi deri në cilin vit në Shqipëri?
Kita Sallabanda: Nëna ime ka ardhur definitivisht në Spanjë në vitin 2000.
Blendi Fevziu: Çfarë gjeti në Spanjë nga Spanja që kishte lënën?
Kita Sallabanda: Nëna ime vajti në Spanjë kur kishte të atin e saj 100 vjeç, që i ati jetoi 100 vjeç. Nëna ime e pa në përvjetorin e ditëlindjes së vetë dhe disa muaj më vonë vdes. Ky ishte takimi i parë. Dhe i tha një gjë shumë të bukur i ati i saj; erdhe, u kënaqa që të pashë, tani shko kthehu te burri yt sepse ti e ke shtëpinë atje. Dhe nëna përsëri u kthye në Shqipëri. Ishte viti 1983 kur vajti ajo për herë të parë.
Blendi Fevziu: Në vitin 2000 u vendos definitivisht në Spanjë?
Kita Sallabanda: Po.
Blendi Fevziu: E gjeti shumë ndryshe Spanjën kur shkoi për herë të parë?
Kita Sallabanda: U ambientua me shumë vështirësi.
Blendi Fevziu: Pse?
Kita Sallabanda: Sepse ajo kishte kujtimet e një Spanje ndryshe dhe gjeti një Spanjë ndryshe. Ajo jetoi në një botë ruse, sovjetike dhe u kthye në një botë të lirë demokratike dhe kjo kishte kontradiktat e saj.
/a.r
