Prokuroria fillon hetimet për “nxjerrje të sekretit hetimor” në çështjen “CEZ”.
Objekt i hetimit është mënyra se si ka dalë në media dëshmia e shtetasit Elvis Mataj, ishpunonjës i kompanisë DIA, në pronësi të Kastriot Ismailajt.
Dokumenti prej shtatë faqesh u bë publik në datën 24 shtator 2015, gjatë kohës që çështja e CEZit ishte në vëmendjen e debateve politike në vend.
Faksimilet e publikuara plotësisht në formën e dokumentit, me kokë dhe me gjithë përmbajtjen, kanë edhe disa vula dhe firma në të.
Dokumenti që u bë publik në media ishte nxjerrë nga dosja penale që Prokuroria kishte hetuar në vitin 2014 për çështjen e abuzimit me mbledhjen e faturave të prapambetura të CEZit.
Sipas burimeve të Prokurorisë, thuhet se pjesë e dokumentit të bërë publik, ka qenë edhe një shënim ku theksohej se përmbajtja e shtatë faqeve përbënte sekret hetimor.
Faksimilja e botuar në media në shtatë faqe përmban pyetjet e prokurorit Dritan Rreshka dhe përgjigjet e dhëna nga Elvis Mataj, gjatë seancës së mbajtur në Prokurorinë e Tiranës në datën 12 qershor 2014.
Për shkak të përmbajtjes së procesverbalit, që mbrohet nga sekreti hetimor, publikimi i dokumentit u bë shkak për nisjen e verifikimeve nga ana e Prokurorisë. Panorama
