Gardisti që u arrestua dy ditë më parë nga SHÇBA, ka pasur një histori dashurie të mëparshme me 39vjeçaren që e denoncoi për përndjekje.
Lidhja mes Leard Xhikës dhe shtetases me iniciale E.L., kishte zgjatur 5 vjet dhe po prej kaq vitesh ishte ndërprerë me kërkesën e të arrestuarit, pasi ai kishte vendosur të fejohej me një vajzë tjetër, me të cilën tashmë është i martuar dhe ka një fëmijë.
Vendimi ishte respektuar nga ana e të dëmtuarës, e cila pretendon se kohët e fundit kishte filluar të shqetësohej thuajse çdo ditë nga ishi dashuri. Madje në dy raste ai i kishte shkuar edhe në shtëpi, duke tentuar të futej me forcë brenda.
Historia e përndjekjes ka vijuar për 5 muaj rresht dhe 39 vjeçarja ka hezituar ta denoncojë në Polici, duke mos dashur që të dëmtojë martesën e ishtë dashurit 10 vjet më të vogël. Megjithatë, kur shqetësimet që ai i sillte sa vinin e shtoheshin çdo ditë, ajo i është drejtuar Komisariatit nr.1, ku e ka kallëzuar 29vjeçarin Xhika për përndjekje.
DESHMIA
Shtetasja 39vjeçare me iniciale E.L. ka dhënë deklarime paraditen e së martës në prezencë të oficerëve të Shërbimit të Çështjeve të Brendshme dhe Ankesave, duke denoncuar për përndjekje efektivin e Gardës së Republikës, Leard Xhika.
Në dëshminë e saj ajo ka treguar episodet që i ka konsideruar më problematiket, që i kanë shkaktuar stres dhe ankth. “Kam pasur një lidhje gati 5 vjeçare me Leard Xhikën, lidhje që ai vendosi t’i jepte fund 5 vjet më parë kur u fejua me gruan që ka tani. E respektova vendimin e tij dhe vazhdova punën time. Ndërsa ai ka gati 5 muaj që më shqetëson. Më ka shkaktuar jo pak probleme, pasi më bezdis në telefon orar pa orar. Më del në rrugë, madje më ka ardhur edhe në shtëpi, duke dashur të futet brenda me forcë. Kanë ndodhur dy raste të tilla dhe ia kisha bërë të qartë që do ta denoncoja në Polici, pasi deri tani po e falja për hir të familjes së tij”, është shprehur 39-vjeçarja. Në Polici ajo ka dorëzuar edhe disa mesazhe në formë presioni që ai i kishte dërguar në celular gjatë kësaj kohe.
ARRESTIMI
Punonjësi i Gardës së Republikës, Leard Xhika, 29 vjeç, është vënë në pranga pasditen e së martës, pasi ka përndjekur prej 5 muajsh ishtë dashurën e tij 10 vjet më të madhe. Ngjarja është denoncuar në mëngjes nga e dëmtuara në Komisariatin nr.1. Efektivi i Gardës së Republikës, Leard Xhika, me origjinë nga Dibra dhe banues në Tiranë, shërbente në këtë institucion prej 5 vitesh.
Ai është martuar para 4 vitesh dhe është baba i një vajze të vogël. Por prej 5 muajsh, të paktën sipas kallëzimit të 39vjeçares E.L., ai insistonte që të krijonte një lidhje jashtëmartesore, për të cilën është refuzuar vazhdimisht nga vajza. Përndjekjen e kësaj shtetaseje, punonjësi i Gardës e ka kryer duke i bërë presion me anë të telefonit, si edhe duke e kontaktuar fizikisht atë në vendet e frekuentuara prej saj, si në punë, afër banesës dhe në ambiente të tjera publike. Panorama/d.i.
