Një ditë pas ngjarjes së rëndë ku administratori i Njësisë Administrative Tomin,Nuri Meda pretendon se është dhunuar nga një eksponent i Partisë Demokratike, në një intervistë për Report Tv ka thënë se personi që e ka dhunuar është Dritan Selishta, ku me doreza hekuri e ka qëlluar në pjesë të ndryshme të trupit, ndërkohë që i ka kafshuar edhe gishtin.
Në intervistën e dhënë, ai ka thënë se ka qenë duke pirë kafe në një lokal, kur dikush e ka njoftuar se disa persona po shpërndanin para për blerje votash e kur ai ka shkuar në Pilafe ka takuar Selishtën me të cilin fillimisht ka debatuar, por më pas janë konfliktuar.
Meda ka shtuar se në vendin e ngjarjes ka qenë edhe policia, por kjo e fundit nuk ka ndërhyrë si duhet, pasi i ka ikur edhe dhunuesi, ndërkohë që shton se ka qenë policia ajo që e ka çuar në spital për të marrë ndihmën mjekësore.
I pyetur për akuzat e Partisë Demokratike se ai ka bërë blerje votash, Meda shton se kanë qenë demokratët ata që janë zënë prej tij duke shpërndarë para në këmbim të votave.
“Isha me ca shokë duke pi kafe në një lokal, më njoftuan që PD po shpërndan ca lekë në Pilafe, lajmërova policinë dhe me disa shokë shkova atje dhe gjeta një makinë në mes të fshatit. Aty ishin disa persona, dhe iu them se ça bëjnë, ata më thanë se ca të keqe ka. Iu thashë se me njoftuan që po shpërndani lekë, ikni në shtëpinë tuaj e unë në timen. Erdhën disa persona të tjerë dhe tentuan që të më qëllonin dhe iu thashë mos e bëni se njihemi e jemi krushq. Më rrahën dhe më qëlluan, në atë moment ishte në vendin e ngjarjes. Policia po të donte do e kapte, por nuk e kapi. Më qëlloi me doreza hekuri në pjesë të ndryshme, sidomos në sy dhe tani e kam të qepur. Policia ma solli në spital. Gjatë rrugës deputetët e PD nuk hapnin rrugën dhe mezi kam shkuar në spital. Unë kam dëshmitar që më kanë lajmëruar dhe makinën e atyre shokëve e kam qenë në bilardo, unë shkova nuk më gjetën mua ata. Unë jam administrator dhe dua që të mos ndodhin të tilla fenomene, ata duan të bëjnë shamata”.
Ngjarja ndodhi mbrëmjen e kësaj të enjte ku u dhunua barbarisht Administratori i Komunës Tomin, Nuri Meda.
Sipas shtabit elektoral të kandidatit të koalicionit “Aleanca për Shqipërinë Europiane” Muharem Rama, militantë të Partisë Demokratike kanë dhunuar barbarisht administratorin e komunës Tomin, Nuri Meda në një kohë kur ai ishte në kryerje të detyrës së tij. Dhunimi është kryer në kohën kur disa eksponentë të Partisë Demokratike me në krye Dritan Selishtën dhe grupin e koordinuar nga Agron Kuliçi ishin në veprim duke shpërndarë para për të blerë vota. Të kapur në flagrancë ata kanë goditur barbarisht administratorin e komunës Tomin.
Por ndryshe nga sa njoftoi PS, sipas PD, Nuri Meda u kap duke blerë vota. PD nuk mohoi dhunën ndaj Administratorit Meda, pasi në asnjë rast nuk e përgënjeshtroi ngjarjen. PD deklaron se Nuri Meda dhe Robert Aga jane kallëzuar penalisht ne prokurori për blerje votash.
ma.me
