Pak kanë jetuar momente nga të cilat mund të ndryshonin rrjedhën e historisë. Marita Lorenz ishte një ndër to. Ishte gruaja që kishte në dorë Fidel Castro, që mund t’i jepte fund jetës së tij duke ndryshuar rrjedhën politike të Kubës, por nuk e bëri. E lindur në Gjermani, Marita lindi në një kamp nazist. Në vitin 1959 ajo udhëtoi drejt Kubës ku takoi Fidel Kastron, me të cilin ra në dashuri.
Ajo sot është 76 vjeçe dhe kohë e fundit ka publikuar një libër me kujtime me titull “Unë, spiunia që dashuroi komandantin”. Lorenz rrëfen se ka qenë e dashura sekrete e Kastros për 8 muaj, për t’u bërë më pas agjente sekrete e CIA-s. Gjermania rrëfen se historia me Fidelin nisi kur një anije e babait të saj mbërriti në Havana në fillim të vitit 1959.
“Pashë një grup të rinjsh me uniforma ushtarake. Më ra në sy menjëherë më i madhi prej tyre. Mbante në dorë një puro. E pyeta sesi quhej, “Yo soy Cuba. Commandante Fidel Castro”, tregon ajo, duke shtuar se vetëm pak minuta më vonë, me pretekstin se do t’i tregonte anijen, ata të dy u gjendën në kabinë dhe aty shkëmbyen puthjen e parë.
Pasi u kthye në Nju-Jork, vajza mori një telefonatë nga Fidel Kastro dhe menjëherë udhëtoi drejt Kubës, ku u vendos në hotelin “Hilton”. Në dy dhoma pranë njëra-tjetrës flinin Kastro dhe Çe Guevara. Marrëdhënia e tyre zgjati 8 muaj dhe gjatë kësaj kohe Lorenz zbuloi se Kastro nuk ishte një burrë dhe aq pasionant në shtrat.
“Ishte më shumë i interesuar për përkëdhelje sesa për aktin seksual në vetvete, por në fund të fundit, të gjithë diktatorët kështu janë”, thotë gruaja, e cila ka edhe një fëmijë me diktatorin e Venezuelës, Marcos Perez Jimenez.
“Ishte narcist, shihej në pasqyrë dhe përkëdhelte mjekrën e vet. I mungonte besimi në vetvete, ose më mirë kishte nevojën ë përhershme të përkëdhelej si një fëmijë i vogël”, tregon ajo.
Për të dhe Kastron nuk mund të kishte të ardhme, pasi ai i kishte thënë se “jam i martuar me Kubën”.
Lorenz ngul këmbë se ka mbetur shtatzënë me Kastron, por pasi ka refuzuar ta abortojë fëmijën, atë ia kanë hequr gjatë një lindjeje të provokuar, ndërkohë që ishte nën efektin e drogës. Gjermania thotë se me kthimin e saj në Amerikë, CIA-ja e kontaktoi dhe i ngarkoi detyrën që të eliminonte Kastron. Marita pranoi marrëveshjen nga CIA në të cilën ajo do t’i jepte atij kapsula të mbushura me helm. Ajo arriti deri aty sa të fuste pilulat në dhomën e tij të gjumit në kutinë e saj të kremit, por pilulat u shpërbënë në krem dhe ajo kishte dyshime për aftësinë e saj që t’ja jepte me forcë Kastros kremin e fytyrës, por gjithashtu dhe u tremb.
Sipas Lorenz, Kastro në një farë mënyre e zbuloi planin e saj dhe i ofroi pistoletën e tij qe ta vriste, “Nuk e bëj dot Fidel”, i tha ajo. Fideli nxorri armën nga këllëfi dhe e pyeti; “A nuk erdhe që të më vrasësh?”
“Mendova se ai do të më vriste, por ai me la armën në dorë dhe më pyeti, ‘Hë pra, a nuk erdhe që të më heqësh qafe?”
Marita tregon se, në atë çast, Fideli vuri një puro në gojë dhe mbylli sytë. “Ai e dinte se unë nuk do e bëja dot. Dhe unë nuk e vrisja dot. Unë ende e doja atë, dhe ai mua”.
“Për këtë kishte të drejtë. Hoqa plumbat nga pistoleta dhe u lëshova në krahët e tij”, tregon Lorenz.
Por historia e saj nuk merr fund këtu. Lorenz nga frika se CIA mund ta vriste nëse qëndronte ende me Kastro, u kthye në Majemi ku u fsheh për shumë kohë, dhe ky ishte momenti kur ajo nuk e pa më me sy të dashurin e saj. Edhe pse ra në dashuri me një tjetër diktator, me venezulianin, Marcos Pérez Jiménez, me të cilin u bekua me një vajzë, Lorenz thotë se dashuria për Kastro nuk u venit kurrë.
“Që në momentin që pashë ishullin ku duhet të veproja si vrasëse, e kuptova që nuk e bëja dot këtë. Mund të kem reputacion si vrasëse, por unë nuk vras dot një mizë”, thotë Lorenz.
