Gjykata e Durrësit ka vendosur masën e sigurisë “arrest në burg” për dy vëllezërit Ekonomi, të cilët akuzohen se rrahën për vdekje 60-vjeçarin Agim Arapi.
Mbrojtja i kërkoi trupës gjykuese një masë më të lehtë, duke ofruar garanci pasurore në këmbim, por gjyqtarja e çështjes vendosi t’i linte në burg Kostandin dhe Kujtim Ekonomin. Kërkesa për arrest me burg erdhi nga organi i akuzës, të cilët i bënë një përmbledhje të gjithë dinamikës së ngjarjes së 11 prillit. Avokatët e vëllezërve e pranuan dinamikën e ngjarjes që paraqiti prokurori por kërkuan masën e arrestit për shpi ose garancinë pasurore.
Vetë të akuzuarit nuk pranuan të shpreheshin, duke u pajtuar me përfaqësimin e avokatëve të tyre. Pasi dëgjoi të gjitha palët, trupi gjykues i përfaqësuar nga gjyqtarja Eda Kaja vendosi për dy vëllezërit masën e arrestit në burg.
Kostandin dhe Kujtim Ekonomi nuk morën përsipër të flisnin apo të jepnin detaje mbi konfliktin, si dhe as iniciativën që të kërkonin falje para trupit gjykues për krimin e kryer. Sipas tyre, qëllimi nuk ishte ta vrisnin 60-vjeçarin, por vetëm ta trembnin dhe i kërkuan që ai t’i kërkonte të falur dhëndrit të tyre, Jurgen Kurtit, me të cilin kishin debatuar disa minuta më parë.
Në seancën gjyqësore morën pjesë të afërm e familjarë të autorëve të dyshuar të krimit, por asnjë prej familjes së viktimës Agim Arapi. Gjithashtu, edhe Jurgen Kurti, i cili ishte molla e sherrit për këtë ngjarje të rëndë, nuk ishte i pranishëm në sallë, për të mbështetur vjehrrin e tij. Për të evituar ndonjë konflikt të mundshëm mes familjarëve të autorit dhe të viktimës, policia kishte shtuar forcat e sigurisë në sallën e gjyqit, pavarësisht se nuk u konstatua asnjë prej familjarëve të viktimës.
