Dy vëllezër kanë dhunuar me grushte dhe sende të forta kunatin e tyre para portës së një Komisariati Policie në Tiranë. Ngjarja ka ndodhur në qershor të këtij viti përballë Komisariatit nr.3. Vëllezërit K. T. dhe G. T. sapo kishin dalë nga ambientet e Komisariatit, ku kishin shoqëruar motrën e tyre, e cila kishte kallëzuar dhunën nga bashkëshorti.
Pak ditë më parë, Gjykata e Tiranës ka përfunduar gjykimin ndaj dy vëllezërve, të cilët u proceduan pas ngjarjes dhe u dërguan si të pandehur për konsumimin e veprës penale të “dhunës në familje”.
Ata u arrestuan në kushtet e flagrancës nga efektivët e Komisariatit në fjalë dhe u hetuan më tej në masën e sigurisë “arrest në burg”.
Gjykimi i tyre në Gjykatën e kryeqytetit u mbyll me një seancë gjyqësore, në përfundim të së cilës trupi gjykues i deklaroi të pandehurit fajtorë për akuzën e ngritur ndaj tyre dhe i dënoi me nga 5 muaj e 10 ditë heqje lirie secilin.
Sipas vendimit të Gjykatës, episodi i dhunës në familje është shënuar mbrëmjen e 5 qershorit 2016, në rrugën “Mine Peza”, pikërisht përballë godinës së Komisariatit të Policisë nr. 3, Tiranë.
“Të pandehurit G. T. dhe K. T. gjendeshin në atë moment përballë Komisariatit të Policisë nr. 3, pasi motra e tyre ishte paraqitur për të bërë kallëzim penal për dhunën e ushtruar nga bashkëshorti i saj T. P.
Në momentin që po prisnin që të përfundonin veprimet hetimore, ata kanë parë afër godinës së Komisariati kunatin e tyre, i cili ishte në këmbë pranë makinës së tij”, thuhej në vendimin e Gjykatës.
Prania e kunatit, ndaj të cilit familjarja e tyre po bënte një kallëzim, duket se nuk është pritur mirë nga të pandehurit. Sipas rrethanave të cituara në vendimin e gjykatës, në këtë moment dy të pandehurit janë afruar në drejtim të kunatit.
Pasi kanë mbërritur në vendin që ai ishte, ata e kanë qëlluar me grushte dhe sende të forta. Nga veprimet e tyre ndaj kunatit, këtij të fundit i kanë shkaktuar dëmtime të rënda për shëndetin.
Sipas aktit të ekspertimit mjekoligjor, të mbajtur për të dëmtuarin T. P., ka rezultuar se ai ka pësuar dëmtime që i kanë shkaktuar humbjen e aftësisë për punë në masën mbi nëntë ditë.
Panorama/d.i.
