Mediat e japin si të sigurt largimin e tij nga Reali i Madridit në përfundim të këtij sezoni, por Cristiano Ronaldo nuk mendon kështu. Pas 4 golëshit që realizoi ndaj suedezëve të Malmos duke u bërë futbollisti i parë në historinë e Championsit që arrin kuotën e 11 finalizimeve në fazën e grupeve, 30-vjecari qetësoi tifozët e Los Blancos përsa i përket të ardhmes së tij. Manchester United dhe Paris Saint Germain e duan me cdo kusht por CR7-ta është i lumtur në Madrid dhe dëshiron të qëndrojë gjatë te Reali.
” Ato që thuhen në media janë thjeshtë spekullime, një gjë e tillë ka ndodhur cdo vit, njerëzit janë mësuar tashmë të dëgjojnë se cfarë ndodh rreth e përqark Cristianos. Por ajo që dua të them është se ky klub më ka ndihmuar shumë që nga momenti që kam mberritur këtu dhe unë jam i lumtur te Reali. Biseda me Blanc? Mund ta shpjegoj shumë thjeshtë nëse dikush të trajton mirë, është mëse normale të flasësh me të. Nëse ndonjë person, që është pjesë e Chelsea-it, Manchester United apo Barcelonës tregohet i sjellshëm me mua, unë nuk e kam problem të bisedoj me të. Por kjo nuk do të thotë asgjë. Unë kam një kontratë me Realin dhe dua të qëndroj këtu”.
Më pas portugezi foli edhe për Topin e Artë. Ronaldo është pjesë e treshes finaliste, edhe pse favoriti i madh këtë herë për të fituar trofeun është Lionel Messi.
” Nuk jam i fiksuar pas Topit të Artë. Unë jam i kënaqur me sezonin që kam zhvilluar deri tani edhe pse në fillim pata disa probleme. Tashmë kam më shumë besim në vetvete dhe ekipi po më ndihmon shumë”.
Në media është folur për një raport aspak të mirë mes Cristiano Ronaldos dhe Rafa Benitez, por luzitani në intervistën e tij nuk nguroi të mbështeste trajnerin spanjoll, ndërkohë që dha një mendim edhe për rekordet e njëpasnjëshme që po vendos.
” Benitez po bën një punë shumë të mirë. Duhet ti japim kohë atij. Nuk i kuptoj aspak vërrshëllimat e tifozëve në drejtim të Rafës edhe pse fansat mund ti shprehin si të duan ndienjat e tyre. Rekordet? Unë nuk kërkoj rekordet, rekordet më kërkojnë mua”. Supersport
