Ronaldo hyn në histori: 501 gola në karrierë
Cristiano Ronaldo arrin një tjetër objektiv të madh. Me golin e shënuar mbrëmë kundër Malmos preku kuotën e 500 golave në karrierë.
Cristiano Ronaldo shënoi golin e parë, kur u mbush gjysmë ore lojë, teksa arriti edhe disa rekorde personale, duke shënuar edhe golin e dytë në minutën e fundit të ndeshjes. Isco futi në një korridor interesant, në mesin e pjesës së parë, dhe Ronaldo, pasi e kontrolloi topin, tundi rrjetën me një goditje të saktë, në cepin e majtë. Reali e dominoi ndeshjen, megjithatë nuk i siguroi tre pikët deri në minutën e fundit. Ky ishte goli numër 500 në gjithë karrierën e Cristiano Ronaldo, një shifër jubilare, historike, e cila përkon edhe me thyerjen e rekordit të Raul Gonzales, si futbollisti që ka shënuar më shumë gola për fanellën e Realit në Champions League dhe barazimin e tij si golashënuesi më i mirë i Realit në të gjitha veprimtaritë.
Por portugezi nuk u mjaftua me kaq. Ai shënoi edhe golin e dytë, në minutën e fundit të ndeshjes, kur Malmo kishte mbetur me dhjetë futbollistë, i shërbyer nga Vazquez, duke kapur 501 golat. Ky ishte goli i tij i 67 në 65 ndeshje të luajtur në Champions me fanellën “merengues”, një më shumë se Raul. Gjithashtu ishte goli i 323-të me Realin në të gjitha veprimtaritë, aq sa Raul.
