Presidenti i zgjedhur i Shteteve të Bashkuara të Amerikës, Donald Trump, do t’i ofrojë ish-kandidatit për president më 2012, Mitt Romney, postin e sekretarit të Shtetit, sipas burimeve të Wall Street Journal.
Presidenti i ri amerikan po ashtu pritet të bëjë gjeneralin e pensionuar, James Mattis, sekretar të Mbrojtjes në administratën e tij, ndërsa guvernatorja e Karolinës së Jugut, Nikki Haley, pritet të bëhet ambasadore e re e Amerikës në Organizatën e Kombeve të Bashkuara, transmeton Gazeta Express.
Shtyrja e vendimit të Trumpit për sekretarin e Shtetit është rezultat i një lufte të brendshme ndërmjet mbështetësve të Romneyt, dhe atyre që duan zgjedhjen e ish-prefektit të Nju-Jorkut, Rudy Giuliani, në këtë post. Një grup i tretë është duke i bërë Trumpit trysni që të vazhdojë kërkimin për kandidatë, sipas burimeve të WSJ.
Trump e sheh Romneyn, ish-guvernator i Masaçusetsit, si zgjidhje shembullore për postin e kryediplomatit të vendit, dhe këshilltarët e tij po e nxisin atë që ta zgjedhë atë sekretar të Shtetit, sipas këtyre burimeve, përgatiti Express. (b.an)
