Avokati Romeo Kara ka komentuar rezultatin e deritanishëm të zgjedhjeve të 11 majit, ku duket një epërsi e lartë e Partisë Socialiste. Kara ka thënë për Report Tv se partitë e vogla kanë marrë shumë vota nga kampi i Partisë Demokratike dhe, sipas tij, janë kërcënuese ndaj tyre në vijim të mandatit të ardhshëm.
Avokati tha se PD dështoi të arrijë në pritshmëritë e këtyre zgjedhjeve dhe, për më tepër, në gjurmën e rezultatit të 2021. Nga ana tjetër, Kara tha se Rama tregoi se jeton në fushatë dhe arriti të parashikojë rezultatin e vet.
“Partitë e vogla i kanë hyrë më shumë në hise pjesës së PD-së, pra kanë marrë vota më shumë nga të pakënaqurit e PD-së. PD nuk arriti të ringrihet dhe të arrijë as në gjurmën e 2021, pra Rama ka pasur shumë të drejtë që nuk do të marrin kurrë atë që kanë marrë në 2021. S’po flas pastaj për parashikimin që i ka bërë fitores së vet, se po del për herë të dytë, se ky person e parashikoi si herë të parë në Kuç dhe herën e dytë. Tregon që ai është gjithë kohën në fushatë. Tregon që ai është drejtuesi elektoral i partisë, jeton në fushatë tërë kohën dhe qeveris gjithmonë për të ndikuar në elektorat. Mesa shoh, edhe ai do t’i ketë marrë nga një pjesë e PD-së, PL-së dhe partive të tjera. Në PS s’ka pasur garë me Partinë Demokratike, lista e hapur po lufton të marrë sa më shumë nga vetë garuesit brenda PS.”-tha Kara për Report Tv.
