Mënyra se si çiftet ndajnë detyrat e shtëpisë mund të luajë rol në kënaqësinë që përjetojnë në marrëdhënien e tyre.
Hulumtimet kanë treguar se gratë zakonisht mbajnë mbi vete pjesën më të madhe të barrës mendore që lidhet me organizimin e jetës familjare.
Nuk janë domosdoshmërisht qirinjtë aromatikë apo një darkë e kushtueshme ato që ndihmojnë në ruajtjen e romancës. Ndonjëherë, një gjest kaq i thjeshtë sa të dish vetë kur duhet të nxirret koshi i mbeturinave mund të ketë rëndësi.
Sipas The Times, disa studime në fushën e psikologjisë tregojnë se në marrëdhënie nuk ndikon vetëm ndarja konkrete e punëve të shtëpisë. Po aq e rëndësishme është edhe “barra mendore”, që nënkupton kujtimin, planifikimin dhe koordinimin e detyrave familjare.
Kjo barrë përfshin angazhime të zakonshme, si caktimi i vizitave të fëmijëve te dentisti, programimi i aktiviteteve të tyre, kujdesi për rrobat që duhen larë dhe mbajtja mend e ditës kur duhen nxjerrë mbeturinat.
Gratë vazhdojnë të mbajnë pjesën më të madhe të barrës mendore
Një kërkim i fundit, i drejtuar nga psikologia Verena Klein e Universitetit të Southamptonit, u përqendrua te mënyra se si çiftet e ndajnë këtë përgjegjësi.
Në studim morën pjesë 452 gra britanike që bashkëjetonin me partnerë meshkuj, si dhe 156 çifte heteroseksuale nga Britania dhe Shtetet e Bashkuara.
Të dhënat treguan se, në shumicën dërrmuese të rasteve, gratë përballeshin me një pjesë më të madhe të organizimit mendor të familjes.
Studiuesit vunë në dukje se kjo pabarazi nuk ishte e padukshme për burrat. Edhe ata e kuptonin se barra nuk ndahej në mënyrë të barabartë.
“Pabarazia ishte shumë e qartë. Nuk ishte thjesht një perceptim i grave që burrat nuk e shihnin. Të dy partnerët raportonin të njëjtën gjë”, tha Klein.
Kush i kryen detyrat nuk është i vetmi faktor
Për gratë, mënyra e shpërndarjes së barrës mendore rezultoi më e lidhur me kënaqësinë në çift sesa pyetja se cili partner i kryente fizikisht punët.
Për shembull, njëri mund t’i fusë rrobat në lavatriçe, ndërsa tjetri të jetë përgjegjës për të kujtuar momentin e larjes, për të blerë detergjentin dhe për të planifikuar detyrat e tjera të shtëpisë.
Gratë shprehën më shumë kënaqësi në marrëdhënie kur përgjegjësitë e planifikimit dhe organizimit ndaheshin në mënyrë më të barabartë.
Te burrat u vu re një rezultat i ndryshëm: ata deklaruan kënaqësi më të madhe kur partneret e tyre merrnin përsipër një pjesë më të madhe të barrës mendore.
Barra e organizimit mund të reflektohet edhe në jetën seksuale
Studimi tregoi gjithashtu se gratë ishin më të kënaqura seksualisht kur partnerët merrnin më shumë përgjegjësi për anën emocionale dhe organizative të marrëdhënies, përfshirë planifikimin e aktiviteteve romantike dhe të rasteve të veçanta.
Kërkime të tjera kanë evidentuar po ashtu një lidhje mes ndarjes së punëve në shtëpi dhe kënaqësisë seksuale.
Në vitin 2022, studiues nga Universiteti Queen’s në Ontario shqyrtuan më shumë se 1,000 nëna. Ato që merreshin me një pjesë më të madhe të punëve të shtëpisë raportuan dëshirë më të ulët seksuale ndaj partnerit.
Ndikimin më të madh në këtë rënie të dëshirës e kishin partnerët që nuk angazhoheshin me detyrat për fëmijët ose që nuk jepnin kontribut të mjaftueshëm në planifikimin e jetës sociale dhe familjare.
Sipas studiuesve, kjo mund të shpjegohet me faktin se gratë mund t’i shohin partnerët jo si të barabartë, por si persona që varen prej tyre.
Ndarja e drejtë e detyrave lidhet me kënaqësi më të madhe
Një studim tjetër, i udhëhequr këtë vit nga Universiteti i Colorado Boulder, arriti në përfundimin se pabarazia në punët e shtëpisë lidhej më shpesh me uljen e dëshirës seksuale te gratë që kishin pikëpamje më të barabarta për rolet gjinore.
Edhe një kërkim i Universitetit të Kalifornisë në Los Anxhelos, UCLA, me pjesëmarrjen e rreth 3,500 të rriturve amerikanë, dha rezultate të ngjashme.
Personat që ishin më të kënaqur me mënyrën e ndarjes së punëve të shtëpisë raportuan njëkohësisht më shumë kënaqësi në marrëdhënie dhe në jetën seksuale.
Megjithatë, studiuesit nënvizojnë se këto të dhëna nuk dëshmojnë se ndarja e punëve shkakton drejtpërdrejt përmirësimin e jetës seksuale. Ato tregojnë një lidhje mes faktorëve, por nuk vërtetojnë shkakësinë.
Një mundësi tjetër është që çiftet më të lumtura në marrëdhënien e tyre të jenë edhe më të afta për ta organizuar së bashku jetën e përditshme.
Përgjegjësi është edhe të mbash mend se çfarë duhet bërë
Sipas psikologes Klein, përfundimi kryesor i studimit është se barra mendore nuk duhet trajtuar si diçka e parëndësishme.
Nxjerrja e mbeturinave përbën një detyrë më vete, por të jesh personi që duhet të kujtojë çdo herë ditën kur ato duhen nxjerrë është një përgjegjësi tjetër. Nëse një partner duhet t’i përsërisë vazhdimisht tjetrit se çfarë ka për të bërë, barra mendore vazhdon të mbetet te i pari.
Prandaj, ndarja e detyrave në çift nuk përcaktohet vetëm nga ai që e kryen punën, por edhe nga ai që duhet të mendojë, ta planifikojë dhe ta kujtojë atë.
