Kandidati demokratik për president të Shteteve të Bashkuara, Bernie Sanders, ka mbështetur legjislacionin që do t’i lejonte amerikanët ta padisin Arabinë Saudite (AS) për sulmet e 11 shtatorit 2001.
Por, projektligji kundërshtohet nga administrata e Obamas, megjithëse është shumë i rëndësishëm për familjet e viktimave, disa nga të cilat besojnë se zyrtarët sauditë kanë luajtur rol në sulmet e 11 shtatorit.
Sanders ka folur në favor të projektligjit në emisionin “Today Show” në televizionin NBC, pak para zgjedhjeve primare presidenciale të Nju Jorkut.
Ai tha se do të ishte e rëndësishme të kuptohej plotësisht roli i mundshëm i qeverisë saudite në sulmet e 11 shtatorit.
Ndërkohë, hetimet e ShBA-ve nuk tregojnë për ndonjë lidhje në mes të Qeverisë saudite apo zyrtarëve të vetë dhe sulmeve, por Sanders thotë se disa përfundime të hetimeve ende mbesin të fshehta.
Ai tha se Arabia Saudite promovon një islam shumë ekstrem dhe shkatërrimtar.
Pesëmbëdhjetë nga 19 rrëmbyesit e aeroplanëve në sulmet e 11 shtatorit 2001, të cilët shkatërruan Qendrën Tregtare Botërore dhe vranë mijëra njerëz, ishin qytetarë të Arabisë Saudite.
