Drejtoria e Përgjithshme e Burgjeve ka emëruar Robert Kodrën në postin e drejtorit të burgut të Korçës. Kandidatura e Kodrës është mirëpritur edhe nga Ministria e Drejtësisë. Drejtori i ri i burgut të Korçës, Robert Kodra, vjen në këtë post pas një karriere të gjatë në ushtri. Pak ditë më parë, Ministri i Drejtësisë Ylli Manjani shkarkoi drejtorin e burgut të Korçës, Laert Çeliku, me motivacionin e menaxhimit jo të duhur të punës në institucionin që drejtonte.
Shkeljet u evidentuan pas raportit të inspektimit që u zhvillua në datat 15 16 tetor 2015 dhe kishin të bënin me:
* Abuzivitet me listat e të dënuarve të punësuar sipas organikës së miratuar, ku u gjetën emra fiktivë; (Sipas rregullores së Përgjithshme të Burgjeve dhe Ligjit nr. 8328 “Për të drejtat dhe trajtimin e të dënuarve me burgim dhe të paraburgosurve”, nga punësimi në institucion të burgosurit përfitojnë ulje dënimi dhe vlerësime pozitive të sjelljes.)
* Mangësi në elementet e sigurisë, ku vërehej se kontrollet e kryera në institucion nuk dokumentoheshin dhe nuk zhvilloheshin në të gjithë sektorët gjatë natës. Në blloqet e punës nuk pasqyrohej aktiviteti i specialistëve të sektorit të policisë. Të paraburgosurit qëndronin në observim për një kohë më të gjatë sesa ajo e parashikuar nga rregullorja. Komisioni i masave disiplinore të IEVP përbëhej nga 4 anëtarë, ndërkohë që rregullorja parashikon 5 anëtarë dhe të dënuarit nuk njiheshin me vendimin e komisionit për marrjen e masës disiplinore etj;
* Procesin e dhënies së lejeve shpërblyese e të veçanta, ku evidentoheshin parregullsi të ndryshme;
* Mangësi në shërbimet e tjera mbështetëse.
