Arjen Roben nuk ka vendosur ende për të ardhmen. Edhe pse bosët e Bajernit janë shprehur të sigurt për qëndrimin e tij të paktën edhe për një vit, 32-vjeçari holandez po luan “poker” duke paraqitur disa opsione. Pas mbylljes së karrierës, Roben nuk përjashton angazhimet e tij jashtë Europës, në SHBA ose Kinë. Mesfushori i Bajernit gjatë konferencës për shtyp në Doha flet për të ardhmen, ëndrrën e tij, si dhe vitin 2017.
Roben, cila ka qenë ëndrra juaj më e madhe në karrierë?
Ëndrra ime ka qenë gjithmonë të fitoja Champions-in. Pas dy finaleve të humbura (2010, 2012), në fund ia dolëm. Në këtë formë realizova ëndrrën time të madhe në 2013-n.
Ndryshimi i skemës së lojës u mirëprit nga ju. Cilin sistem favorizoni, 4-3-3 apo 4-2-3-1?
Këtë e vendos trajneri, por skema me një mesfushor në pozicion 10 (4-2-3-1) na përshtatet më mirë. Kemi qenë më rezultativë dhe më të suksesshëm.
Kontrata juaj skadon në fund të sezonit. Keni vendosur për të ardhmen?
Rinovimi i kontratës nuk është bërë ende çështje diskutimi në planet e mia. Unë jam përqendruar në 6 muajt e ardhshëm dhe dua të fitoj titullin. Nuk kam përcaktuar ende asgjë. Kam akoma një kontratë. Ndoshta më pas qëndroj edhe një vit ose dy. Nuk di ende asgjë.
Kur keni në plan të mbyllni karrierën?
Nuk e kam menduar ende. Është herët, pasi jam vetëm 32 vjeç dhe për fat ndihem mirë fizikisht e psikologjikisht. Më pëlqen shumë të luaj futboll. Kur kalon të 30-at, e ndien që fundi po të afron. Ndoshta vjen ndonjë vendim spontan, pa plan.
Parashikoni që një ditë të luani në Kinë?
Në Kinë po lëvizin shumë gjëra. Secili duhet të bëjë llogaritë personale dhe të mos i paragjykojë. Nuk thua dot kurrë që Kina nuk mbetet një opsion. Tani jam te Bajerni, por po diskutoj planet e mia edhe me familjen, e cila është kryesore. Është çështje ndjenje plani i së ardhmes. Ndoshta mund të vijë një ditë pas mbylljes së karrierës që të luaj në Kinë ose SHBA. Ndoshta vjen një ditë që të rikthehem edhe në vendlindje. Të ardhmes nuk i dihet. Nuk ka asgjë të prerë me thikë.
Besoni te një fazë e dytë më rezultative se e para?
Kryesore është që e mbylla vitin në gjendje të mirë fizike. Nuk kemi shpalosur ende maksimumin tonë. Ky Bajern ka akoma shumë për të dhënë. Qëllimi ynë është të qëndrojmë në formë, të stërvitemi intensivisht dhe më pas vijnë rezultatet. Personalisht jam në superformë.
Çfarë është e rëndësishme në start të vitit 2017?
Vitin e kaluar isha i dëmtuar dhe nuk pata mundësi të stërvitesha në Doha. Është e rëndësishme që në janar të mbajmë ritmin dhe të startojmë me një seri fitoresh. Duhet të kujdesemi për njëritjetrin, që në fazën vendimtare të jemi të gjithë në gatishmëri./panorama/a.k
