Ministri i Financave, Arben Ahmetaj, informoi dje se nga muaji shtator deri më 15 maj, 48 mijë qytetarë kanë aplikuar për rivlerësimin e shtëpive. Ministri Ahmetaj tha se nga ulja e taksës qytetarët kanë kursyer 250 milionë dollarë.
Në konferencën për shtyp për prezantimin e treguesve të ekonomisë të 3- mujorit të parë të 2017-s, ministri i Financave Ahmetaj tha se konsolidimi i ekonomisë është mbështetur nga investimet e huaja, rritja e punësimit dhe rritja e besimit të biznesit dhe konsumatorëve.
Ministri tha se nga thithja e investimeve të programit 1 miliard dollarë, synohet që në fund të mandatit të dytë rritja ekonomike të jetë 6 për qind. Ahmetaj informoi edhe për fillimin e shpërndarjes së këstit të 8-të për kategorinë parësore të përndjekurve.
RIVLERËSIMI
Në fund të muajit mbyllet aftit i rivlerësimit të shtëpive me taksën 2 për qind, nga 15 për qind që ishte më parë. Ministri i Financave informoi aplikimet e kryera deri më 15 maj dhe përfitimet që kanë marrë qytetarët nga ulja e taksës.
“Që nga 1 shtatori deri në 15 maj në vend janë regjistruar 48 mijë aplikime me një vlerë totale prej 3,95 miliardë lekësh. Si rezultat i uljes së tatimit nga 15 për qind në 2 për qind qytetarët kanë kursyer 25,6 miliardë lekë apo 250 milionë dollarë. Sot për shkak të rivlerësimit të pronës së tyre, të një vlere të re që ka prona në referencë të zhvillimeve të tregut, vlera e pronës së shqiptarëve është rritur me 1,9 miliardë dollarë.
Për ta thënë farë thjesht, nëse një apartament vlerën kontabël historike e ka pasur 2 milionë lekë, në vlerën e tregut sot e ka 5 milionë lekë. Kjo vlerë i shërben qoftë në kryerjen e transaksionit të shitblerjes, qoftë në rastin e një kolaterali kredie”, tha Ahmetaj.
TË PËRNDJEKURIT
Ministri Ahmetaj tha se për kategorinë e ish-të përndjekurve politikë qeveria ka shpërndarë deri tani 5,8 miliardë lekë. Ahmetaj tha se për kategorinë parësore ka nisur shpërndarja e këstit të 8-të të dëmshpërblimit. “Për ish-të përndjekurit nga 2009 deri në 2013 janë shpërndarë 1,47 miliardë lekë. Për periudhën 2014 deri në 2017 janë shpërndarë 5,8 miliardë lekë. Kemi filluar këstin e tetë, para 5 ditësh kam firmosur fillimin e shpërndarjes të këstit të 8-të. Imagjinoni se çfarë diference ka trajtimi që u ka bërë çadra të përndjekurve dhe trajtimi që i ka bëra qeveria Rama të përndjekurve”, u shpreh Ahmetaj.
RRITJA EKONOMIKE
Ministri i Financave Ahmetaj tha se vendi ka lënë pas krizën dhe se rritja ekonomike është konsoliduar. Ministri Ahmetaj dha dhe arsyet e konsolidimit ekonomik. “Unë besoj se konsolidimi ekonomik ka ardhur nga investimet e huaja, investimet vendëse, nga rritja e punësimit, nga rritja e kërkesës së brendshme dhe besimi i aktorëve tek ekonomia dhe këto janë arsyet”, tha Ahmetaj.
Ministri u shpreh se në fund të mandatit të dytë synohet të arrihet rritje ekonomike deri në 6 për qind. “Kemi thënë që do të rrisim ekonominë në një mesatare; Në fund të mandatit do të jetë rritja 5,5 për qind me një mesatare të kalkuluar 4,5 për qind me një mandat është e mundur. Unë besoj se do të ecim me projektin 1 miliard dollarë investime dhe, nëse do të tërheqim më shpejt investime të huaja, mund të arrijmë edhe 6”, tha ministri./a.ç
