Ish-ylli i Brazilit, Rivaldo, pret që Real Madridi të marrë më të mirën nën drejtimin e Zinedine Zidane, ndërsa iu bën thirrje mbështetësve të klubit të mos kalojnë në panik. Të bardhët barazuan 1-1 me Real Valladolid, fundjavën e kaluar, duke lënë pikët e para në ndeshjen e dytë të La Liga-s.
“Edhe pse lanë dy pikë në shtëpi, fundjavën e kaluar, unë nuk shoh arsye që klubi dhe tifozët të futen në panik. Kështu është fillimi i një kampionati të ri. Ju patë në javën e parë që edhe Barcelona humbi, – tha Rivaldo për “BetFair”. – Kësi mendimesh duhet të vijnë vetëm pas 10 ndeshjesh apo më shumë, nëse gjërat nuk po përmirësohen. Zidane po ritregon tonin e tij në skuadër dhe së shpejti gjërat do të përmirësohen. Klubi do të luftojë për titullin në La Liga dhe Champions. Personalisht, por nuk dyshoj se mund të bëjnë një lëvizje tjetër në merkato, para mbylljes së afatit përkatës.
Me sa duket, PSG kërkoi Vinicius, si pjesë e një transferimi të mundshëm të Neymar te Real Madridi. Unë nuk do të pranoja, po të isha Vinicius. Sigurisht, kjo do të varet nga vullneti i lojtarit për të luajtur më shpesh, por ai luajti mirë sezonin e kaluar dhe nuk duhet të nxitojë. Vinicius ka gjithçka të mundshme për të shkëlqyer te Real Madridi”.
