Në përfundim të seancës gjyqësore, ku Kushtetuesja nisi shqyrtimin e vlefshmërisë së mandatit për deputetin Koço Kokëdhima, deputeti Arben Ristani u shpreh se Gjykata do vendosë në favor të kërkesës së PD-së, pasi sipas tij Kokëdhima ka përfituar nga fondet publike në më shumë se 150 raste.
Ristani shtoi se vendimi do jepet i drejtë nëse nuk iu bëjnë presion gjyqtarëve.
“Ajo që vlen pas një suksesi të pjesshëm në luftën për dekriminalizim, që ka çuar në burg deputetë të dënuar për vepra të rënda ka nisur edhe lufta kundër dekusarizimit pasi deputetët janë turrur të kapin sa më shumë pasuri. Kokëdhima ka kryer veprimtari private ndërkohë që e ka të ndaluar. Ka përfituar nga fondet publike në më shumë se 150 raste. Shpresoj që gjyqtarët të mos jenë marrë në telefon duke iu thënë do ju këpusim këmbët si në rastin e gjyqtares së Krujës. Besoj që nuk do dërgojnë Shullazët për të kërcënuar gjyqtarët”,- tha ai.
