Deputeti i PD-së, Arben Ristani është shprehur në mbështetje të plotë të sistemit të drejtësisë, të prokurorisë dhe gjykatave për t’i shkuar deri në fund hetimit për skandalin e përgjimeve.
Gjatë fjalës së mbajtur në Kuvend, e teksa ka bërë një paralelizëm me mbështetjen që po i jepet në Maqedoni prokurorëve të cilësuar heronj për hetimet ndaj qeveritarëve në akuzë, Ristani ka thënë se ai është në mbështetje të plotë të prokurorëve dhe gjykatave.
“Do doja që edhe unë këtu të kisha një bluzë të veshur me fytyrën e prokurorit të përgjithshëm, që në të parën përpjekje serioze për të treguar forcën e ligjit dhe barazinë për të gjithë, pikërisht tani fillon një sulm i çmendur i kryeministrit dhe Ministrit të Brendshëm kundër prokurorisë dhe gjykatave”, tha Ristani.
Ai deklaroi se shqiptarët e mbajnë mend se si ky kryeministër mbështeste gjykatën që drejtësia dhe jo politika të thoshte fjalën e fundit lidhur me rastin e ish kryebashkiakut të Vlorës, Shpëtim Gjika, “Në fakt, kreu i bashkisë i po të njëjtës bandë u dërgua në burg e doli pse rrezikonte jetën, dhe Rama atëherë mbronte drejtësinë”, tha ai.
D.I.
