368 turistë francezë kanë mbërritur mëngjesin e së martës në Vlorë, pas ankorimit të kroçerës Berlin në portin e këtij qyteti. Ata do të vizitojnë disa pika turistike të Jugut. Sipas kapitenit të kroçeres, Alberto Tarozi këtë dimër Shqipëria do të jetë në iterneraret e tyre, por edhe të anijeve të tjera turistike.
Zbarkon në portin e Vlorës kroçera “Berlin” me 368 turistë Francezë, pavarësisht përfundimit të sezonit turistik. Ata do të vizitojnë Llogaranë, qytetin e Beratit dhe parkun e Apolonisë. Kroçera është ankoruar mëngjesin e së martës në portin e qytetit bregdetar pas një itinerari që ka përshkuar nga Franca në Itali, aktualisht ndodhet në Shqipëri e më pas do të udhëtojë drejtë Greqisë. Kapiteni i kroçerës, Alberto Tarozi konfirmon se nuk është hera e parë që kjo kroçerë zbarkon ne brigjet shqiptare dhe portin e Vlorës. Madje këtë dimer, mesdheu dhe Shqiperia do të jenë në iteneraret e tyre, por edhe anijeve të tjera turistike.
Nuk është hera e parë që vij në Shqipëri. Jemi ankoruar këtu me këtë anije dhe me pëlqen shumë Vlora. Po shikoj që këtu po bëhen shumë punë të mira. Krocera është nisur nga Nisa e Francës, kemi kaluar nga Italia, Siçili dhe këtu në Shqipëri. Pas ndalesës do shkojmë në Greqi. Ne kemi qenë më këtë kroçerë në Sarandë më përpara, dhe më pas në Durrës dhe sot në Vlorë.
Të impresionuar për mbërritjen tyre për herë të parë në Vlorë, janë shprehur edhe turistët të cilët thonë se Vlora është qytet shumë i bukur dhe ato çfarë kanë parë ata para se të ankorohen.
Sipas kapitenit kjo anije do të vijojë të sjellë turistë të huaj në Shqipëri, pasi interesimi për të vizituar bregdetin shqiptar është shtuar ndjeshëm. (Shqiptarja.com)
