Minisitri i Financave, Shkëlqim Cani deklaroi të enjten se qeveria nuk ka në programin e saj plan për rritje të taksave.
Përkundrazi, vijoi ai, po shikojmë çdo mundësi për uljen e tyre. Duke marrë fjalën në Kuvend teksa prej disa orësh po diskutohet Akti Normativ për ndryshime në buxhetin e vitit 2015, Cani tha se ndryshimet nuk shtojnë defiçitin buxhetor, pra ruhen treguesit bazë makroekonomik.
Diferenca në të ardhurat e mbledhura në buxhet, sipas ministrit Cani, vijnë për shkak se ekonomia është orientuar drejt prodhimit vendas, por edhe për shkak të rënies së interesave në tregun bankar.
Një tjetër arsye, ministri renditi edhe presionet e ulëta inflacioniste, pasi siç u shpreh ai, kur kemi hartuar buxhetin kemi planifikuar inflacion në mesataren 2.5 %, por realisht deri në fund të muajit korrik u vërtetua një inflacion prej 1.3 %. “Shqiptarët blejnë mallra me çmime më të ulëta, pavarësisht se në buxhet mblidhen më pak të ardhura”, deklaroi ministri Cani.
Ministri duke folur për operacionin e qeverisë për informalitetin në ekonomi, i bëri thirrje komunitetit të biznesit të heqin dorë nga bilancet e dyfishta pasi do të ashpërsohen masat ligjore.
“Ky akt normativ është i domosdoshëm për t’i dhënë zhvillimin e duhur rritjes ekonomike”, tha ministri Cani. Po ashtu, Cani deklaroi se rishikimi i buxhetit lindi si domosdoshmëri edhe nga reforma administrative.
