Brenda këtij muaji ministria e Financave do të paraqesë ndryshime në buxhetin e vitit 2016.
Burime nga ministria e Financave bënë të ditur se rishikimi i buxhetit do të bëhet brenda këtij muaji dhe se do të ketë një rialokim të fondeve, ku prioritet është rritja e fondeve për investimet në infrastrukturë.
Rishikimi i buxhetit, thanë burimet, parashikon rialokimin e më shumë fondeve për ministrinë e Transportit dhe Infrastrukturës pasi rrugët kanë nevoja të mëdha për financime. Nga ana tjetër, për herë të parë nuk preken të ardhurat tatimore.
Në fund të 6-mujorit të parë të këtij vitit, të ardhurat totale, sipas treguesve fiskalë paraprakë, janë realizuar në masën 198.1 miliardë lekë, me një tejkalim rreth 102 milionë në raport me planin e 6-mujorit të parë 2016.
Ndërsa shpenzimet e përgjithshme publike, për 6 mujorin e parë të vitit 2016, arritën në rreth 180.1 miliardë lekë me një realizim në masën 89%. Kjo tregon se në terma të planit 6 mujor niveli i realizimit të shpenzimeve të përgjithshme publike ka patur një rritje krahasuar me një muaj më parë, me një tendencë rritëse për gjysmën e dytë të vitit 2016.
Ministria e Financave shpjegon se krahasuar me planin e parashikuar, niveli i të ardhurave ka një realizim të rëndësishëm në shifrat e parashikuara ose e thënë ndryshe pothuajse e plotë, por nga ana tjetër trendi i kujdesshëm i shpenzimeve të realizuara në raport me planin ka rezultuar me sufiçit prej 18 miliard lekë.
