Organizimi i Partisë Socialiste pritet që të ketë një formulë të re, siç është ajo e ndarjes së vendit në gjashtë rajone, për të cilën kreu i kësaj force politike Edi Rama ka caktuar edhe deputetët e ministrat që do të mbikëqyrin çdo proces, qoftë atë të zgjedhjeve të brendshme apo dhe atë të performancës së administratës kryesisht drejtorëve nga Jugu në Veri.
Kjo ndarje e re u bë e ditur pikërisht në mbledhjen e para 2 ditëve të Ramës me deputetët e qarkut të Vlorës, të Gjirokastrës, si dhe drejtuesve lokalë të partisë dhe pushtetit në bashki. Gjatë takimit, ai u prezantoi skemën e re organizative të PS-së dhe u komunikoi se bashkimi mekanik i Qarkut të Vlorës me atë të Gjirokastrës do të formojë rajonin e Jugut, një njësi e re organizative e Partisë Socialiste. Në krye të këtij rajoni u caktua Koço Kokëdhima, deputet i Vlorës. Përveç këtij rajoni, janë përcaktuar dhe ata të tjerë në vend, ku përkatësisht ministri i Çështjeve Sociale, Blendi Klosi, do të drejtojë qarqet Fier – Lushnjë, ministri i Brendshëm, Saimir Taliri, do drejtojë qarqet Tiranë – Durrës, deputeti Taulant Balla do të drejtojë qarqet Elbasan – Korçë, ndërsa ministri i Jashtëm, Ditmir Bushati, do të ketë në monitorim të plotë qarqet Kukës – Dibër.
Ajo që ende nuk është përcaktuar, është pikërisht se kush do të drejtojë qarqet e Shkodrës dhe Lezhës, i cili do të bëhet e ditur në mbledhjen e ditës së hënës nga kryesocialisti Rama dhe deputetëve të këtyre qarqeve. Takimi është lajmëruar pikërisht në orën 20:00 të ditës së hënë, ku të pranishëm do të jenë deputetët e Shkodrës, Lezhës, Kukësit dhe Dibrës.
