Rinumërimi i votave për Qarkun e Tiranës vijon pa problematika. Sipas të dhënave në KQZ deri më tani janë numëruar 25 kuti.
Nga hapja e tyre ka rezultuar se deri më tani Partisë Socialiste i ishin numëruar 30 vota më shumë më 11 maj, ndërsa Partisë Demokratike katër. Pas rinumërimit ato janë hequr.
Nga partitë e tjera rezulton të jenë shtuar me nga një votë Partia Mundësia, Nisma Shqipëria Bëhet dhe Partia Socialdemokrate.
Shtesë ka edhe Koalicioni Euroatlantik i Bashës me tre vota.
Kujtojmë se procesi i rinumërimit po zhvillohet në Pallatin e Sportit “Fahrie Hoti”. Për qarkun më të madh në vend, atë të Tiranës do të rihapen në total 1282 kuti votimi për subjektet politike dhe kandidatët.
Procesi në kryeqytet pritet të zgjasë rreth 10 ditë. Pas përfundimit të kësaj faze, do të fillojë rinumërimi në qarkun e Fierit me 587 kuti, e më pas në Durrës, ku do të shqyrtohen 360 kuti votimi, përfshirë 85 kuti që vijnë nga diaspora.
