Gjykata e Posaçme ka urdhëruar SPAK që të nisë procedimin penal sipas kallëzimit të kandidatit të PD për deputet, Aulon Kalaja, për procesin e numërimit të votave për qarkun e Durrësit në zgjedhjet e 11 majit të këtij viti.
Kalaja kishte kallëzuar Komisionin e Ankimimeve dhe Sanksioneve në SPAK, sepse sipas tij nuk kishte vendosur rinumërimin e të gjitha kutive për qarkun e Durrësit, ku Kalaja ishte kandidat për deputet. Pas kallëzimit, SPAK nuk regjistroi procedimin penal, ndërsa këtë të enjte Gjykata e urdhëroi të regjistrojë procedimin penal dhe të nisë hetimin nga anëtarëve të KAS.
Shfuqizimin e Vendimit “Për mosfillimin e procedimit penal” të datës 02.08.2025, të Prokurorisë së Posaçme Kundër Korrupsionit dhe Krimit të Organizuar, lidhur me kallëzimin penal nr. 240, datë 01.08.2025, të kallëzuesit Aulon Kalaja.
Detyrimin e Prokurorisë së Posaçme Kundër Korrupsionit dhe Krimit të Organizuar të regjistrojë procedimin penal për kallëzimin penal të kallëzuesit Aulon Kalaja, duke vendosur edhe drejtimet e mëtejshme të hetimit.
Detyrimin e Prokurorisë të kryejë veprimet hetimore që do të urdhërojë Gjykata.
Konstatimin absolutisht të pavlefshëm të aktit procedural nr. 27631 Prot.(S.K), datë 07.08.2025, me lëndë: “Dërgohet vendimi i prokurorit ‘Për mosfillimin e procedimit penal’”, në bazë dhe për zbatim të nenit 128/a të Kodit të Procedurës Penale.
Pjesë nga vendimi i Gjykatës së Posaçme
Gjykata vlerëson se të gjitha shkeljet e pretenduara nga Kalaja të Kodit Zgjedhor, Kodit të Procedurës Penale dhe Kodit Penal, do të duhet të verifikohen në hetimin paraprak të kësaj çështje për të konkluduar nëse ekzistojnë apo jo.
Më tej duhet të hetohet se sa janë dëmtuar interesat e shtetit nga mosveprimi i shkeljeve të ligjit zgjedhor dhe/apo penal në 341 kuti të hapura, sa janë cenimet e interesave të zgjedhësve dhe i kandidatëve për deputetë në këtë zonë zgjedhore nga falsifikimi i materialeve elektorale dhe gjithashtu, duhet të evidentohet nga hetimi paraprak se sa janë përmasat e përfitimeve të padrejta në vota dhe rezultate të falsifikuara që i janë lejuar kandidatëve për deputetë nga kjo mënyrë e ushtrimit të detyrës nga KAS.
Pjesë nga vendimi i Gjykatës së Posaçme
