Disa thasë me kanabis të grabitura në një parcelë me hashash në malet e fshatit Vrith të Malësisë së Madhe, janë shkaku i zhdukjes së 3 personave në këtë zonë.
Policia ka arritur të zbulojë se Danjel Pepaj, kishte marrë 4 thasë me kanabis dhe nuk u ka treguar Klement Papajt dhe Vilson Çutajt, çka solli edhe sherrin që ndodhi në një lokal të fshatit.
Njëri prej të zhdukurve, Vilson Çutaj, vetëm 5 muaj më parë ishte liruar nga burgu i Reçit. Ai ishte dënuar për kultivim kanabisi dhe sapo ishte liruar, dyshohet se është përfshirë sërish me kultivimin e hashashit.
Kërkimet e policisë kanë rinisur sërish në malet e fshatit Vrith, ku është zbuluar se pikërisht në këtë zonë ka patur edhe kultivim kanabisi.
Përveç policisë, edhe familjarët po kërkojnë për të afërmit e tyre, por ende nuk është gjetur asnjë gjurmë. Autoritetet do të kërkojnë ndihmë në Mal të Zi, pasi ka të dhëna që Danjel Pepaj është larguar drejt këtij vendi.
Ndërkohë zhdukja e 3 personave dhe të dhënat se 2 prej tyre mund të jenë vrarë, ka bërë që në Shkodër të shkojë Drejtori i Policisë, Ardi Veliu, së bashku me kreun e Policisë Kriminale, Tonin Vocaj.
/a.r
